Qazaqstan azamaty Aqjarqyn Turlybaidyń Qytai túrmesinde otyrǵanyna on jyldan asty. Ol 2014 jyly Gýanchjoý áýejaiynda ustalyp, júginen 4,5 keli amfetamin tabylǵannan keiin esirtki tasymaldady degen aiyppen sottalǵan, dep dalanews.kz tilshisi kznews.kz saityna silteme jasap habarlaidy.
Qytai soty qazaqstandyq boijetkendi ómir boiyna bas bostandyǵynan aiyrý jazasyna kesken. Alaida qorǵaýshy tarap Aqjarqyn óz kinásin moiyndamaitynyn jáne onyń halyqaralyq esirtki tasymalymen ainalysqan toptyń qurbany bolýy múmkin ekenin aityp keledi.
Aqjarqyn Turlybai 1994 jyly Túrkistan oblysy Maqtaaral aýdanynda dúniege kelgen. Mektepten keiin pedagogikalyq ýniversitetke oqýǵa túsip, Almatyǵa kóshken. Sol kezde ol Qytaidan kiim ákelip satýmen ainalysqan qurbysymen birge turǵan.
2014 jyldyń naýryzynda Aqjarqyn Qytaiǵa alǵash ret barǵan. Alǵashqy ýaqytta ata-anasymen bailanysta bolǵanymen, keiin habarsyz ketedi. Keiin onyń Gýanchjoý áýejaiynda ustalǵany belgili boldy.
Qorǵaýshylardyń aitýynsha, Nigeriia azamaty Adindý Nonso Fortýna odan Malaiziiaǵa áielder kiimi salynǵan chemodandy jetkizip berýdi suraǵan. Alaida kedendik tekseris kezinde sol júkten esirtki tabylǵan.
Aqjarqyn ózine taǵylǵan aiyppen kelispeidi. Ol chemodannyń ishinde esirtki baryn bilmegenin aitqan. Onyń advokaty Suńqar Nurmaǵambetov te qazaqstandyq stýdenttiń aldanýy múmkin ekenin birneshe ret málimdegen.
Bul jaǵdai Aqjarqynnyń otbasy úshin de aýyr synaq boldy. Anasynyń aitýynsha, qyzyn qorǵaý jáne Qytaiǵa baryp-kelý shyǵyndaryna bailanysty otbasy múlkin satýǵa májbúr bolǵan.
Qamaýda otyrǵan jyldary Aqjarqyn qytai tilin meńgerip, túrmede ioga jáne aǵylshyn tili sabaqtaryn ótkizgeni aitylǵan.
Qazaqstan tarapy ony elge qaitarý máselesin birneshe ret kóterdi. Diplomattar men advokattar ekstraditsiia baǵytynda jumys júrgizgenimen, Qytai tarapy ómir boiyna sottalǵan azamatty berýge ázirge kelisim bermei otyr.
Qorǵaýshylardyń sózinshe, eger Aqjarqynnyń jazasy jeńildetilse, ony Qazaqstanǵa aýystyrý múmkindigi paida bolýy yqtimal. QR Syrtqy ister ministrligi 2025 jyly bul baǵyttaǵy jumys jalǵasyp jatqanyn habarlaǵan. Qazir is Bas prokýratýranyń qaraýynda.
Sonymen qatar Qazaqstan tarapy bul iske qatysy bolýy múmkin Nigeriia azamatyn ekstraditsiialaý máselesin de kóterip otyr.
