Qaraǵandy turǵyny Magamed Gagiev atyshýly qarjy piramidasy isi boiynsha kúdikti retinde qamaýda otyrǵan azamattyq nekedegi jubaiy Lavrenevamen kezdesýge kelgen, dep habarlaidy dalanews.kz.
Patriot arnasynyń habarlaýynsha, basqa advokattar men qoǵamdyq qorǵaýshylardyń kezegine bailanysty arnaiy jabdyqtalǵan kezdesý bólmeleri bos bolmai, kezdesý keiinge qaldyrylǵan.
Osy kezde Gagiev pen Qaraǵandy qalasyndaǵy tergeý izoliatorynyń rejim jáne kúzet bóliminiń aǵa baqylaýshysy Ásel Jambaeva arasynda kikiljiń oryn alǵan. Áseldiń áriptesi janjaldyń aldyn alýǵa tyrysqanymen, Gagiev denesimen politsiia qyzmetkerin iterip, sonyń saldarynan metall izdegishtiń jaqtaýy shaiqalyp, qulai jazdaǵan. Keiin ol Ishki ister ministrliginiń qyzmetkeriniń betinen alaqanymen urǵan. Oqiǵa ornynda bolǵan ekinshi politsiia qyzmetkeri de quqyq buzýshylyqtyń aldyn alýǵa árekettengenimen, úlgermei qalǵan. Gagiev áiel qyzmetkerge qarai umtylyp baryp, taǵy da soqqy jasaǵan. Soqqydan politsiia qyzmetkeri qulap kete jazdaǵan.
Oqiǵa kezinde Gagiev shartty túrde merziminen buryn bosatylǵandardyń qatarynda bolǵan. Buǵan deiin ol Temirtaýdaǵy túngi klýbta 29 jastaǵy Nariman Begimovti qasaqana óltirgeni úshin sottalǵan. Jazasynyń ótelmegen bóligin shartty túrde merziminen buryn bosatý tártibimen ótep júrgen.
Tergeý izoliatorynda politsiia qyzmetkerine kúsh qoldanǵany úshin jáne burynǵy qylmysy boiynsha ótelmegen jaza merzimin eskere otyryp, sot Gagievti túpkilikti 5 jylǵa bas bostandyǵynan aiyrǵan.
Aita keteiik, Qazybek bi aýdandyq sotynyń sýdiasy Aleksei An politsiia qyzmetkeriniń balaǵat sóz qoldanýyna bailanysty jeke qaýly shyǵaryp, sonyń nátijesinde ol tártiptik jaýapkershilikke tartylǵan.
Alaida apelliatsiialyq satynyń sýdiasy Bagdat Serǵaliev úkimdi jeńildetken. Ol Qylmystyq kodekstiń 380-baby («Bilik ókiline qatysty kúsh qoldaný») boiynsha saralanǵan áreketti 109-bapqa («Densaýlyqqa jeńil ziian da keltirmegen uryp-soǵý») qaita saralap, Gagievke qoǵamdyq jumystarǵa tartý jazasyn taǵaiyndaǵan. Tergeý barysynda qamaýda ótkizgen ýaqyty jaza merzimine eseptelip, ol bosatylǵan. Kassatsiialyq sot alqasy bul sheshimdi kúshinde qaldyrǵan.
IIM qyzmetkeri Ásel Jambaeva bul sheshimge qatty tańǵalǵanyn aityp, istiń mán-jaiyn Bas prokýratýradan qaita zerdeleýdi surap otyr. Onyń advokaty Artem Shedogýbovpen birge apelliatsiialyq jáne kassatsiialyq sot alqalarynyń qorytyndylaryn ádiletsiz dep sanaidy. Olar birinshi satydaǵy sottyń sýdia Aleksei An shyǵarǵan úkimin kúshinde qaldyrýdy surap, ony ádildik qaǵidattaryna tolyq sáikes keledi dep esepteidi.
