Qazaqstan Premer-mınıstri Oljas Bektenov Kaspıı mańy elderin Kaspııdiń taıazdanýyna qarsy kúreste yntymaqtastyqqa shaqyrdy, dep habarlaıdy Dalanews.kz.
Oljas Bektenov birinshi Halyqaralyq ekologıalyq konferensıada sóz sóıleý kezinde Kaspıı teńiziniń taıazdaný problemasyn aımaqtyń negizgi syn-qaterleriniń biri retinde atap ótti.
Kaspıı teńizi deńgeıiniń tómendeýine nazar aýdartylyp, Kaspıı mańy memleketteri arasyndaǵy aımaqtyq ózara is-qımyldy jandandyrý qajettigin aıtty.
«2000-shy jyldardyń basynan beri Kaspıı teńizi deńgeıiniń tómendeý úrdisi baıqalady. Osy jáne ózge de problemalardy zertteý úshin Kaspıı teńizi Qazaq ǵylymı-zertteý ınstıtýty quryldy. Ǵalymdardyń boljamdary kóńil kónshitpeıdi. Osynaý biregeı sý aıdynyn saqtap qalý úshin barlyq Kaspıı mańy memleketteriniń batyl úılestirilgen is-qımyly qajet», - dedi Premer-mınıstr.
Sý taqyrybyna qatysty sóılegen sózinde Oljas Bektenov Aral mańyndaǵy jaǵdaıǵa da nazar aýdardy. Búginde Qazaqstan Halyqaralyq Araldy qutqarý qoryn basqarady. Elimizde ony qalpyna keltirý jumystary júrgizilýde, Kókaral bógeti nyǵaıtylýda, Syrdarıa saǵasy qaıta qalpyna keltirilýde, balyq salasyn qoldaý jáne burynǵy teńizdiń keýip qalǵan túbin kógaldandyrý boıynsha jobalar iske asyrylýda.
Premer-mınıstr, sondaı-aq, muzdyqtardy saqtaýǵa baǵyttalǵan jumystardyń da mańyzdylyǵyn atap ótti. Sarapshylardyń boljamynsha, 2100 jylǵa qaraı Ortalyq Azıa muzdyqtarynyń kólemi aıtarlyqtaı kishireıedi. Osyǵan baılanysty Qazaqstan Prezıdentiniń bastamasymen Er-Rıad samıtinde muzdyqtardy zertteý jáne qorǵaý boıynsha kúsh-jigerdi biriktiretin «Sý munaralary seriktestigin» qurý usynyldy. Almatyda IýNESKO qamqorlyǵymen qurylyp, óńirlik zertteýlerdiń jetekshi platformasyna aınalǵan Ortalyq Azıalyq óńirlik glásıologıalyq ortalyq jumys istep tur.
Bul rette Qazaqstannyń sý qoımalaryn retteýden bastap sýdy esepke alýdy avtomattandyrýǵa deıingi birlesken gıdrotehnıkalyq jobalardy iske asyrýǵa daıyn ekendigi atap ótildi.
Premer-mınıstr forým ótip jatqan orynnyń sımvoldyq mánine de nazar aýdartty. Altaı ólkesi - túrki órkenıetiniń besigi, ári mádenı-gýmanıtarlyq ózara áriptestiktiń mańyzdy elementi.
Plenarlyq otyrysqa Reseı Federasıasy Úkimetiniń tóraǵasy Mıhaıl Mıshýstın, Armenıa Premer-mınıstri Nıkol Pashınán, Belarýs Premer-mınıstri Aleksandr Týrchın, Qyrǵyzstan Premer-mınıstri Adylbek Kasymalıev, Tájikstan Premer-mınıstri Kohır Rasýlzoda, Ózbekstan Premer-mınıstri Abdýlla Arıpov, sondaı-aq Túrikmenstan Mınıstrler kabıneti tóraǵasynyń orynbasary Nokergýly Atagýlyev qatysty. Jıynda Kaspııdiń taıazdanýy, muzdyqtardyń erýi jáne bıoalýantúrlilikti saqtaý máselelerimen qatar qorshaǵan ortany qorǵaý salasynda zamanaýı tehnologıalardy qoldaný, sý resýrstaryn basqarýǵa ınovasıalyq sheshimderdi engizý jáne transshekaralyq ekotýrızmdi damytý jaıy talqylandy.
