Túrkistan oblysynda aýdan, qala ákimdikteri men basqarmalarynyń reitngtik júiesi ázirlengen. Árbir mekemege indikatorlar bekitilip, ár toqsan saiyn nátijesi shyǵarylyp, turaqty talqylanady. Osy jumystar nátijesinde biylǵy 6 aida oblys ekonomikasynyń áleýmettik-ekonomikalyq damýynyń oń dinamikasy saqtaldy. Qysqa merzimdi ekonomikalyq ósim 118%-dy qurap, óńir respýblikada birinshi orynǵa shyqty,- dep habarlaidy Dalanews.kz
Oblys ákimidiginde óńir basshysy Nuralhan Kósherovtiń tóraǵalyǵymen 2025 jyldyń I jartyjyldyǵynyń qorytyndysy boiynsha oblystyq alqa májilisi ótti. Mańyzdy jiynǵa aýdan, qala ákimderi, basqarma basshylary qatysty, Májiliste oblysty damytý, indikatorlardy oryndaý máseleleri talqylandy. Reiting sońyndaǵy aýdan, qala ákimderi men basqarma basshylarynyń esepteri tyńdalyp, tiisti syn-eskertpeler aityldy. Oblys ákimi jaýapty basshylarǵa jumysty shiratýdy tapsyrdy.
– Oblysty damytý baǵytynda reitng júiesi engizildi. Ár toqsan saiyn alqa májilisin ótkizip, kórsetkishterdi talqylaitynymyzdy aitqan bolatynmyn. Sol arqyly aýdan, qala ákimderi men basqarma basshylary óz jumystaryn, josparlaryn biledi. Búgin alǵashqy alqa májilisin ótkizip otyrmyz. Jartyjyldyqtaǵy kórsetkishter saralanyp, josparlar jasalady. Baiandamalaryńyzda tapsyrmalardy oryndaý jóninde ýáde bermei, ony qalai oryndaityndaryńyz týraly aityńyzdar. Jalpylama sóz emes, naqty jospar, naqty is qajet. Barshańyzǵa belgili, oblysymyzda 2024-2030 jyldarǵa ekonomikalyq ósýdi qamtamasyz etý boiynsha Jol kartasy bekitilgen bolatyn. Ásirese, investitsiialyq jobalardyń ýaqtyly ári sapaly oryndalýyna basymdyq berińizder. Óndiris oryndaryn ashý boiynsha jumystar júrgizilsin. Bekitilgen Jol kartamasy oryndalmaǵan jaǵdaida jaýapkershilikterińiz qaralatynyn eskertemin. Úshinshi toqsan qorytyndysymen bekitilgen indikatorlardy tolyq oryndaýdy tapsyramyn, – dedi Túrkistan oblysynyń ákimi Nuralhan Kósherov.
Májiliste Túrkistan oblysynyń ekonomika jáne biýdjettik josparlaý basqarmasynyń basshysy Qanat Qaiypbek Túrkistan oblysynyń áleýmettik-ekonomikalyq damýy, aýdan, qala ákimdikteriniń jáne basqarmalardyń qyzmeti tiimdiliginiń reitingtik baǵalaýy boiynsha baiandama jasady. Onyń aitýynsha, barlyq salalar boiynsha mejege qol jetkizilgen. Aýdan qala ákimderi men basqamalardyń qyzmetiniń tiimdiligin baǵalaityn 9 bloktan turatyn 89 indikatordyń biylǵy 6 aiǵa josparlanǵany – 85. Onyń ishinde 79 indikator aýdan, qala ákimderiniń qyzmetine tiesili bolsa, 6 indikator oblys deńgeiinde esepteledi. Jartyjyldyq qorytyndysymen qalyptasqan reitingti I toqsandaǵy kórsetkishpen salystyratyn bolsaq, Qazyǵurt, Sairam jáne Shardara aýdandary reitingte ózderiniń indikatorlaryn jaqsartyp, oń nátije kórsetken. Basqarmalardyń da kórsetkishteri saralandy. Tómen nátije kórsetken aýdan, qala ákimderi men basqarma basshylarynyń esepteri tyńdaldy. Olarǵa jumysty jandandyrý jóninde tapsyrma berildi.
Aita keteiik, 6 ai qorytyndysy boiynsha oblystyń ónerkásip ónim kólemi 723,3 mlrd. teńgeni qurap, 13,5%-ǵa artty. Ósim negizinen óńdeý jáne taý-ken ónerkásibi esebinen boldy. Oblys ekonomikasynyń negizgi salasy – aýyl sharýashylyǵynda ónim kólemi 253,9 mlrd. teńgeni qurap, ósim 104,7% deńgeiinde qalyptasty. Óndirilgen ónim boiynsha Túrkistan oblysy respýblikada kósh bastap tur. Qurylys jumystarynyń kólemi 230,3 mlrd. teńgeni qurap, 25,1%-ǵa artty. Jyl basynan 438,5 myń sharshy metr turǵyn úiler paidalanýǵa tapsyrylyp, ósim 118,2% deńgeiinde qalyptasty. Oblysty damytý baǵytyndaǵy jumystar jalǵasady.
