Túrkistan oblysy Tólebi aýdanyndaǵy Ekpindi aýylynda nóser jaýyn saldarynan Aqmeshit ózeni arqyly ótetin eki jaiaý júrginshiler kópiri qirady. Saldarynan ózenniń arǵy betinde qalǵan turǵyndar ózdiginen óte almaǵan, dep habarlaidy Dalanews.kz.
Ishki ister ministrligi málimetinshe, oqiǵa ornyna alǵashqylardyń biri bolyp politsiia qyzmetkerleri jetken. Olar jaǵdaidy baqylaýǵa alyp, qaýipsizdikti qamtamasyz etken. Keiin jergilikti ákimdik pen tótenshe jaǵdailar qyzmetiniń mamandary arnaiy tehnikamen evakýatsiia uiymdastyrǵan.
Qaýipsiz jerge 78 adam kóshirildi, olardyń 28-i - balalar. Politseiler turǵyndarǵa kómektesip, keibirin qoldaryna kóterip ótkizgen.
Evakýatsiialanǵandar turǵylyqty jerlerine jetkizildi. Qazir politsiia qoǵamdyq tártipti baqylap, turǵyndarǵa túsindirý jumystaryn júrgizip jatyr.
Eske salaiyq, 1 mamyrǵa qaraǵan túni Aqmeshit aýylyndaǵy týristik aimaqta demalys jáne piknik aýmaǵyn bailanystyryp turǵan eki kópirdi sý shaiyp ketken edi.
