Qazaqstanda drondardy zańsyz qurastyrý men paidalanǵany úshin ákimshilik jáne qylmystyq jaýapkershilikti kúsheitý boiynsha naqty sharalar qolǵa alyndy. Bul jóninde Premer-ministr Oljas Bektenov málimdedi, dep habarlaidy Dalanews.kz.
2025 jyldyń 25 maýsymynda Májilis depýtaty Elnur Beisenbaev tiisti depýtattyq saýal joldap, drondardy zańsyz qoldanýǵa qatysty jaza túrlerin qataitýdy usynǵan. Óz jaýabynda premer-ministr bul bastamany qoldaitynyn aityp, quzyrly organdar osy baǵytta jumys júrgizip jatqanyn habarlady.
"Quqyq qorǵaý organdary arnaiy jáne ózge de múddeli memlekettik mekemelermen birlesip, drondardy qarý retinde zańsyz jinaý jáne qoldaný faktilerine qatysty ákimshilik ári qylmystyq jaýapkershilikti kúsheitýge baǵyttalǵan sharalardy ázirlep jatyr. Sonymen qatar, Qorǵanys ministrligi oblystyq jáne respýblikalyq mańyzy bar qalalardyń ústinen drondardyń ushýyna ruqsat etilgen arnaiy UFZ aimaqtaryn, sondai-aq memlekettik kúzettegi nysandardyń ústinen ushýǵa shekteý qoiatyn UARU aimaqtaryn belgileý boiynsha jumystardy jalǵastyrýda", – dedi úkimet basshysy.
Sonymen qatar 2026 jyldyń I toqsanynda (qańtar–naýryz) Qazaqstanda drondardyń ushyrylýyn basqarý, baqylaý jáne kelisý jumystaryn ortalyqtandyratyn Biryńǵai basqarý ortalyǵynyń jospary daiyndalady.
Buǵan qosa, Indýstriia jáne qurylys ministrligi ózge de múddeli organdarmen birlesip, drondarǵa mindetti túrde engiziletin biryńǵai tehnikalyq tańbalaý talaptaryn ázirleidi.
"2025–2031 jyldarǵa arnalǵan ushqyshsyz júielerdi damytý jónindegi arnaiy baǵdarlama aiasynda drondardyń el aýmaǵyna ákelinýi kezinde tańbalanýyn qamtamasyz etý máselesi pysyqtalyp jatyr. Bul jumys taýarlardyń eksport-importyna qatysty qoldanystaǵy zańnama talaptaryna sáikes júrgizilýde. Sonyń nátijesinde drondardyń shyǵý tegin baqylap, olardyń kóleńkeli ainalymynyń jolyn kesetin biryńǵai tehnikalyq talaptar daiyndalady", – dedi Bektenov.
