Qaitarylǵan aktivterdi basqarý kompaniiasy 24 shildede qazaqstandyq oligarhtardan tárkilengen brendtik zergerlik buiymdardyń sátti satylǵany týraly esep berdi, dep habarlaidy Dalanews.kz.
Saýda nátijeleri
Saýdaǵa qoiylǵan 56 lottyń tek 18-i ǵana satyldy. Bastapqy baǵasy shamamen 14,8 mln teńge bolǵan áshekeiler aýktsionda 17%-ǵa qymbat baǵaǵa ótip, memleketke 16,9 mln teńge tabys ákeldi.
Jańa iesin tapqan áshekeilerdiń qatarynda FOPE brendine tiesili bilezik bar – ol 3,5 mln teńgege satyldy (sáýirde ol 3 mln 582 myń teńgege baǵalanǵan bolatyn). Sonymen qatar Picchiotti júzigi, kýlony bar altyn tizbek, izýmrýdpen, injý-marjanmen jáne gaýhar tastarmen bezendirilgen birneshe júzik jáne ózge de zergerlik buiymdar satylǵan.
Saýda ótpegen lottar men baǵa saiasaty
Qaitarylǵan aktivterdi basqarý kompaniiasy málimetinshe, 38 zergerlik buiym boiynsha saýda ótpegen.
«Bul - naryqtyq mehanizmniń tabiǵi bóligi. Atalǵan lottar zańǵa sai belgilengen tártippen qaitadan saýdaǵa shyǵarylady», - dedi kompaniia ókilderi.
Tárkilengen zergerlik buiymdar birtindep satylyp jatyr, alaida kei brendterdiń baǵasy tym joǵary bolǵandyqtan, olardy birneshe márte arzandatýǵa týra keledi.
Eń qoljetimdi lottar, mysaly, Tiffany & Co syrǵalary, burynnan bastapqy baǵamen satylyp ketken.
