Astanada qalanyń 2035 jylǵa deıingi Bas josparyna ózgerister men tolyqtyrýlar engizý jobasyn qoǵamdyq talqylaý ótti. Bul talqylaý qatysýshylar sany boıynsha osyndaı is-sharalar tarıhyndaǵy eń aýqymdysy boldy,- dep habarlaıdy Dalanews.kz
Qorytyndy nátıjeler boıynsha is-sharaǵa 1325 tirkelgen qatysýshy qatysty. Olardyń basym bóligi – 901 adam jańartylǵan Bas jospar jobasyn qoldady. 176 qatysýshy qarsy daýys berdi. Daýys sanaý ashyq formatta júrgizildi, al daýys berý nátıjeleri kórsetilgen resmı hattama Astana qalasynyń Sáýlet, qala qurylysy jáne jer qatynastary basqarmasynyń saıtynda jarıalandy.
14-18 shilde aralyǵynda qala turǵyndary jańartylǵan Bas jospar jobasymen kórme zaldarynda tanysý múmkindigine ıe boldy.
«Astanabasjospar» ǴZJI» JSHS mamandary kún saıyn túsindirý jumysyn júrgizip, kelýshilerdiń suraqtaryna jaýap berip, keńes berdi. Jazbasha usynystardy qabyldaý úshin arnaıy jáshikter ornatyldy.
Qoǵamdyq talqylaýdyń negizgi kúni 22 shilde boldy. Qala turǵyndarynyń joǵary qyzyǵýshylyǵyn eskere otyryp, qosymsha bólmeler qarastyrylyp, onda prezentasıalar translásıalanatyn ekrandar ornatyldy.
Sondaı-aq talqylaý Astana qalasynyń Sáýlet, qala qurylysy jáne jer qatynastary basqarmasynyń Facebook paraqshasynda tikeleı efırde ótti.
2035 jylǵa deıingi joba aıasynda logıstıka, energetıka, aýyl sharýashylyǵy, medısına, týrızm jáne IT salalarynda 125-ten astam ınvestısıalyq bastamalardy júzege asyrý josparlanǵan. Shamamen 15 myń jańa jumys orny qurylady dep kútilýde.
Bas jospardyń negizgi baǵyttary mynalardy qamtıdy:
- 138 mektep, 190 jeke balabaqsha jáne 17 oqýshylar saraıyn salý;
- 231 km jedel qoǵamdyq kólik marshrýttaryn iske qosý jáne jolaýshylar aǵynyn 71%-ǵa deıin arttyrý;
- 750 aýla men qoǵamdyq keńistikti jańartý jáne qurý, onyń ishinde «Myńjyldyq» jelilik parki men «Green Line» jaıaý júrginshiler býlvary;
- bir turǵynǵa jasyl jelekti aýmaq kólemin 19 m²-ge deıin ulǵaıtý (2023 jyly – 14 m²);
- jaýyn-shashyn káriz júıesiniń tıimdiligin arttyrý úshin kolektorlary bar jeti tazartý qurylystaryn salý.
Tanystyrylym barysynda jańartylǵan Bas jospardyń elordanyń ınvestısıalyq tartymdylyǵyn arttyrýǵa, zamanaýı jáne qoljetimdi áleýmettik ári kólik ınfraqurylymyn damytýǵa baǵyttalǵany atap ótildi.
Talqylaý sońynda ashyq daýys berý ótkizildi. Búletenderdi sanaý qatysýshylardyń kóz aldynda júrgizildi. Sol kúni daýys berýdiń aldyn ala qorytyndysy shyǵaryldy. Qorytyndy nátıjelerdi shyǵarý úshin daýys sanaý árbir qatysýshynyń tirkeý derekteri negizinde júrgizildi, sebebi árbir kelýshi aty-jóni, ákesiniń aty, JSN, keri baılanys úshin telefon nómiri jáne suraǵynyń qysqasha mazmuny kórsetilgen tirkeýden ótti.
