استانادا قالانىڭ 2035 جىلعا دەيىنگى باس جوسپارىنا وزگەرىستەر مەن تولىقتىرۋلار ەنگىزۋ جوباسىن قوعامدىق تالقىلاۋ ءوتتى. بۇل تالقىلاۋ قاتىسۋشىلار سانى بويىنشا وسىنداي ءىس-شارالار تاريحىنداعى ەڭ اۋقىمدىسى بولدى،- دەپ حابارلايدى Dalanews.kz
قورىتىندى ناتيجەلەر بويىنشا ءىس-شاراعا 1325 تىركەلگەن قاتىسۋشى قاتىستى. ولاردىڭ باسىم بولىگى – 901 ادام جاڭارتىلعان باس جوسپار جوباسىن قولدادى. 176 قاتىسۋشى قارسى داۋىس بەردى. داۋىس ساناۋ اشىق فورماتتا جۇرگىزىلدى، ال داۋىس بەرۋ ناتيجەلەرى كورسەتىلگەن رەسمي حاتتاما استانا قالاسىنىڭ ساۋلەت، قالا قۇرىلىسى جانە جەر قاتىناستارى باسقارماسىنىڭ سايتىندا جاريالاندى.
14-18 شىلدە ارالىعىندا قالا تۇرعىندارى جاڭارتىلعان باس جوسپار جوباسىمەن كورمە زالدارىندا تانىسۋ مۇمكىندىگىنە يە بولدى.
«استاناباسجوسپار» عزجي» ج ش س ماماندارى كۇن سايىن ءتۇسىندىرۋ جۇمىسىن جۇرگىزىپ، كەلۋشىلەردىڭ سۇراقتارىنا جاۋاپ بەرىپ، كەڭەس بەردى. جازباشا ۇسىنىستاردى قابىلداۋ ءۇشىن ارنايى جاشىكتەر ورناتىلدى.
قوعامدىق تالقىلاۋدىڭ نەگىزگى كۇنى 22 شىلدە بولدى. قالا تۇرعىندارىنىڭ جوعارى قىزىعۋشىلىعىن ەسكەرە وتىرىپ، قوسىمشا بولمەلەر قاراستىرىلىپ، وندا پرەزەنتاسيالار ترانسلياسيالاناتىن ەكراندار ورناتىلدى.
سونداي-اق تالقىلاۋ استانا قالاسىنىڭ ساۋلەت، قالا قۇرىلىسى جانە جەر قاتىناستارى باسقارماسىنىڭ Facebook پاراقشاسىندا تىكەلەي ەفيردە ءوتتى.
2035 جىلعا دەيىنگى جوبا اياسىندا لوگيستيكا، ەنەرگەتيكا، اۋىل شارۋاشىلىعى، مەديسينا، تۋريزم جانە IT سالالارىندا 125-تەن استام ينۆەستيسيالىق باستامالاردى جۇزەگە اسىرۋ جوسپارلانعان. شامامەن 15 مىڭ جاڭا جۇمىس ورنى قۇرىلادى دەپ كۇتىلۋدە.
باس جوسپاردىڭ نەگىزگى باعىتتارى مىنالاردى قامتيدى:
- 138 مەكتەپ، 190 جەكە بالاباقشا جانە 17 وقۋشىلار سارايىن سالۋ؛
- 231 كم جەدەل قوعامدىق كولىك مارشرۋتتارىن ىسكە قوسۋ جانە جولاۋشىلار اعىنىن 71%-عا دەيىن ارتتىرۋ؛
- 750 اۋلا مەن قوعامدىق كەڭىستىكتى جاڭارتۋ جانە قۇرۋ، ونىڭ ىشىندە «مىڭجىلدىق» جەلىلىك پاركى مەن «Green Line» جاياۋ جۇرگىنشىلەر بۋلۆارى؛
- ءبىر تۇرعىنعا جاسىل جەلەكتى اۋماق كولەمىن 19 م²-گە دەيىن ۇلعايتۋ (2023 جىلى – 14 م²)؛
- جاۋىن-شاشىن كارىز جۇيەسىنىڭ تيىمدىلىگىن ارتتىرۋ ءۇشىن كوللەكتورلارى بار جەتى تازارتۋ قۇرىلىستارىن سالۋ.
تانىستىرىلىم بارىسىندا جاڭارتىلعان باس جوسپاردىڭ ەلوردانىڭ ينۆەستيسيالىق تارتىمدىلىعىن ارتتىرۋعا، زاماناۋي جانە قولجەتىمدى الەۋمەتتىك ءارى كولىك ينفراقۇرىلىمىن دامىتۋعا باعىتتالعانى اتاپ ءوتىلدى.
تالقىلاۋ سوڭىندا اشىق داۋىس بەرۋ وتكىزىلدى. بيۋللەتەندەردى ساناۋ قاتىسۋشىلاردىڭ كوز الدىندا جۇرگىزىلدى. سول كۇنى داۋىس بەرۋدىڭ الدىن الا قورىتىندىسى شىعارىلدى. قورىتىندى ناتيجەلەردى شىعارۋ ءۇشىن داۋىس ساناۋ ءاربىر قاتىسۋشىنىڭ تىركەۋ دەرەكتەرى نەگىزىندە جۇرگىزىلدى، سەبەبى ءاربىر كەلۋشى ءاتى-جونى، اكەسىنىڭ اتى، جسن، كەرى بايلانىس ءۇشىن تەلەفون ءنومىرى جانە سۇراعىنىڭ قىسقاشا مازمۇنى كورسەتىلگەن تىركەۋدەن ءوتتى.
