Astanada qosymsha bilim berý salasynda «bir bala – bir vaýcher» júiesi iske qosyldy. Burynǵy júiede bir bala birneshe úiirmege qatysa alsa, endi basymdyq áleýmettik osal toptarǵa beriledi. Bul jańashyldyq ata-analar men balalarǵa qalai áser etedi? Qandai ózgerister bar? Osy suraqtar tóńireginde Astana qalalyq bilim basqarmasynyń basshysy Qasymjan Senǵazyev aityp berdi,- dep habarlaidy Dalanews.kz
2021 jyly Memleket basshysynyń tapsyrmasyna sáikes elimizde vaýcherlik qarjylandyrý júiesi iske qosylǵan bolatyn.
"Bul júie arqyly ár bala shyǵarshylyq úiirmege bolsyn, sport sektsiiasyna nemese basqa da úiirmege bolsyn qatysqysy kelse, qosymsha bilimdi memleket esebinen ala alady. Alaida tájiribe barysynda ádiletsizdik oryn aldy: bir bala birneshe baǵyttan vaýcher alsa, keibir áleýmettik osal otbasylar múlde qamtylmady. Sonymen qatar ár basqarma – sport, mádeniet, bilim – óz kezekterin júrgizip, ata-analar arasynda túsinispeýshilik týyndady", - deidi maman.
Qasymjan Senǵazyev osy olqylyqtardy joiý úshin naqty ózgerister engizilgenin málimdedi.
"Eń basty ózgeris – vaýcher endi uiymǵa emes, naqty balaǵa beriledi. «Bir bala – bir vaýcher» qaǵidaty engizildi. Sonymen qatar biz áleýmettik ádildikti basty orynǵa qoidyq: bala kezekke turǵan kezde onyń áleýmettik mártebesine bailanysty koeffitsient esepteledi. Biz balalardy 12 sanatqa bóldik. Máselen, erekshe bilimdi qajet etetin balalarǵa koeffitsient – 5, jetim nemese múgedek ata-anasy bar balalarǵa – 3–4, kópbalaly otbasy balalaryna – 2. Al qalǵandarǵa – 1. Mysaly, kópbalaly otbasynan shyqqan bala júiege keiin tirkelse de, áleýmettik jaǵdaiy eskerilip, kezekte alǵa shyǵady", - deidi ol.
Osy platforma jaiynda ata-analar men uiymdardy aqparattandyrý úshin Astana qalasynyń ákimdigi jaýapty mamandar men tehnikalyq mamandar arqyly birqatar túsindirý jumystary men oqytý seminarlaryn ótkizdi.
"Biz QOSYMSHA.KZ platformasyn jetildirdik, jeke kabinetter engizdik. Ata-analar balanyń mártebesin engizip, kezekke tura alady, uiymdy ózderi tańdaidy. Jáne ai saiyn bala qatysqan kúnder boiynsha rastaý jasap otyrady – bul qarjyny ádil bólýge múmkindik beredi", - deidi maman.
Astana qalalyq bilim basqarmasynyń basshysy Qasymjan Senǵazyev jańartylǵan júieniń basty artyqshylyqtara toqtaldy.
"Eń aldymen – ádildik. Júie áleýmettik osal topqa basymdyq beredi. Ekinshiden – ashyqtyq: ata-ana ózi tańdaidy, ózi rastaidy. Úshinshiden – qoljetimdilik: erekshe bilimdi qajet etetin balalarǵa alǵash ret tolyq múmkindik berilip otyr. Bul – biz úshin óte mańyzdy qadam. Qosymsha bilim – jai úiirme emes, balanyń áleýetin ashatyn, ómirlik daǵdylaryn qalyptastyratyn keńistik. Bul júie arqyly biz barlyq balaǵa óz jolyn tabýǵa múmkindik beremiz", - dedi ol.
