Almaty oblysynda «Qymyzmuryndyq – 2026» mádeni-kópshilik jáne sporttyq sharasy ótti. Saltanatty sharada QR Prezidentiniń keńesshisi Málik Otarbaev Memleket basshysynyń quttyqtaýyn jetkizdi. Al Almaty oblysynyń ákimi Marat Sultanǵaziev dúbirli dýmannyń mańyzyna toqtalyp, qonaqtarǵa izgi tilegin arnady. Sondai-aq meimandar «Qymyzmuryndyq» aiasynda uiymdastyrylǵan kórmeni aralap kórip, ulttyq oiynnan synǵa túsken sportshylardyń ónerin tamashalady, dep habarlaidy dalanews.kz.
Málik Nurjanuly Memleket basshysy Qasym-Jomart Toqaevtyń ystyq sálemin jetkize otyryp, Prezidentimizdiń ulttyq qundylyqtardy ulyqtap, ata dástúrimizdi dáripteýge arnalǵan osyndai taǵylymdy is-sharalarǵa erekshe mán beretinin aitty. Sonymen qatar Kegen aýdanynda ótip jatqan «Qymyzmuryndyq» merekesi urpaqtar sabaqtastyǵyn nyǵaita túsetinine senim bildirdi.
Aimaq basshysy óz sózinde halyqtyń qoldaýymen qolǵa alynǵan igi bastamalardyń ǵumyry qashanda uzaq bolatynyn tilge tiek etti. Sondai-aq Almaty oblysy búginde tabiǵi bailyǵy men tarihi murasyn ushtastyra otyryp, týrizmdi damytýdyń jańa kezeńine qadam basqanyn jetkizdi. Aimaq basshysynyń aitýynsha, ótken jyly óńirimizge 2,5 millionnan astam týrist kelgen. Bul Almaty oblysynyń tabiǵi əleýeti men tarihi-mədeni murasyna degen qyzyǵýshylyqtyń turaqty artyp kele jatqanyn kórsetedi.
Aita keteiik, «Qymyzmuryndyq» merekesi Qarqara jailaýynda biyl 5-ret ótkizilip, qazaqtyń kóregen abyzy Əlmerek Janshyqulynyń 368 jyldyǵymen tuspa-tus keldi. Osyǵan orai abyz baba rýhyna Quran baǵyshtalyp, as berildi. Sondai-aq ulttyq sport túrlerinen respýblikalyq jarystar uiymdastyrylyp, sportshylardyń shymyrlyǵy men tózimdiligi synǵa tústi.
