Qazaqstan áskeri júiege jasandy intellekt (JI) engize bastady, dep habarlaidy Dalanews.kz.
Endi áskerge shaqyrylatyndardy túrli ásker túrine bólý kezinde jańa júie tómendegi derekterdi saraptaidy:
- bilim deńgeii
- otbasylyq jaǵdaiy
- antropometriialyq kórsetkishteri (boiy, salmaǵy)
- densaýlyq jaǵdaiy
"Biz jappai shaqyrý tásilinen jekelegen irikteý formatyna kóshemiz. JI We naqty ári tiimdi bólýge múmkindik beredi", — dedi qorǵanys ministriniń orynbasary Darhan Ahmediev.
Sonymen qatar joǵary oqý ornynyń stýdentteri men múmkindigi shekteýli azamattar avtomatty túrde shaqyrylýshylar tiziminen shyǵarylady — olarǵa bul týraly SMS-habarlama keledi. Al algoritmder qalǵan azamattardy qolda bar derekterge súienip, qai ásker túrine jaramdy ekenin anyqtaidy.
Bolashaqta JI modýlderi áskerden qaitqan sarbazdarǵa arnalǵan granttar júiesin qarastyratyn "Sarbaz 2.0" baǵdarlamasyna da engiziledi.
Budan bólek, Darhan Ahmediev jaqyn arada áskeri oqý oryndaryna qujat tapsyrý e-Gov arqyly júzege asatynyn aitty. Qazirdiń ózinde "Askeri Ziyat" atty jańa platforma jasaqtalyp, engizile bastady. Ol platforma elektrondy kúndelik, sabaq kestesi men áskeri bilimge arnalǵan onlain kitaphanany qamtidy.
Vitse-ministrdiń aitýynsha, búginde memlekettik qyzmetterdi tsifrlandyrý men ońtailandyrý jumysy belsendi júrgizilip jatyr. Máselen, buryn birneshe aiǵa sozylatyn arnaiy tekserý merzimi endi birneshe kúnge qysqardy.
Eske sala keteiik, buǵan deiin Qazaqstanda merzimdi áskeri qyzmetke shaqyrý tártibi qatańdatylǵan bolatyn.
Degenmen bul bastamalar arasyndaǵy eń kóp kúmán týdyrǵan tusy – áskerge shaqyrylatyndardy JI arqyly bólý júiesi. Bir jaǵynan, jasandy intellektke "qaltaǵa aqsha salyp, jyly orynǵa suraný" múmkin emes. Ekinshi jaǵynan, sheneýnikter bul júieni de ainalyp ótýdiń jolyn taýyp, artynan "bárin JI sheshti" dep silteme jasap, jaýapkershilikten jaltarýy múmkin. Al bul óz kezeginde jemqorlyqpen kúresti odan ári qiyndatady.
