Qazaqstan úsh birdeı jylý-elektr ortalyǵyn reseılik áriptesterdiń kómeginsiz ózi salatyn boldy. Bul týraly Úkimet úıinde ótken brıfıńte Premer-mınıstrdiń orynbasary Roman Sklár málimdedi, dep habarlaıdy Dalanews.kz.
Sklárdyń aıtýynsha, bastapqyda Kókshetaý, Semeı jáne Óskemen qalalaryndaǵy úsh JEO-ny Reseıdiń «Inter RAO» kompanıasy turǵyzýy tıis bolǵan. Ol úshin kompanıa Qazaqstannan jeńildetilgen shartpen qarjy alýdy kózdegen.
«Alǵashqy jospar boıynsha, «Inter RAO» bul jobalardy eksporttyq qarjylandyrý esebinen júzege asyrmaq bolǵan. Alaıda, kompanıa qajetti qarjy kózderin tarta almady. Sondyqtan Qazaqstan bul jobalardy óz qarajaty esebinen júzege asyrýǵa sheshim qabyldady», – dedi Sklár.
Qazir Kókshetaýdaǵy JEO qurylysynyń alǵashqy kezeńi bastalyp ketken. Jobanyń bas merdigeri – «Samuryq-Energo» ulttyq kompanıasy. Semeı jáne Óskemen qalalaryndaǵy JEO-lardy salý jumystary da dál osyndaı tártippen júrmek.
«Eger aldaǵy ýaqytta reseılik seriktester tarapynan qarjy tartý týraly usynystar tússe, «Samuryq-Energo» olardy qarastyrýǵa ázir. Buǵan esh kedergi joq. Mundaǵy basty maqsat – tarıfterdi qoljetimdi deńgeıde ustap turý», – dep tolyqtyrdy vıse-premer.
Ázirge ár JEO-nyń naqty quny jarıalanǵan joq. Biraq Roman Sklárdyń aıtýynsha, bir gıgavatt qýatqa jumsalatyn qarajat shamamen 2-2,5 mıllıon dollardy quraýy múmkin.
Aıta keteıik, 2023 jyldyń qarashasynda Qazaqstan-Reseı arasyndaǵy HİH Óńiraralyq yntymaqtastyq forýmynda vıse-premer Serik Jumanǵarın úsh birdeı JEO-ny Reseımen birlesip salý jospary týraly habarlaǵan edi. Alaıda, qazirgi jaǵdaıda bul jobalardy Qazaqstan ózi júzege asyratyn boldy.
