Búgingi tsifrly zamanda balalardyń bos ýaqytyn telefon, planshet, teledidar siiaqty quraldar alyp qoiǵany jasyryn emes. Alaida kitap – balanyń oi-órisin keńeitip, til bailyǵyn arttyratyn, ómirge degen kózqarasyn qalyptastyratyn eń basty qural. Sondyqtan ata-ana men muǵalimniń mindeti – balanyń kitap oqýǵa degen qyzyǵýshylyǵyn erte jastan qalyptastyrý, dep habarlaidy Dalanews.kz.
Kitap oqý arqyly bala sózdik qoryn baiytady, logikalyq oilaý qabileti damidy, shyǵarmashylyqpen oilaýǵa beiimdeledi, ádebi tildi meńgeredi jáne emotsiialyq intellektisi qalyptasady.
Jaqsy kitap – balanyń ishki jan dúniesin tárbieleidi, durys sheshim qabyldaýǵa úiretedi, ózgelerdiń jaǵdaiyna túsine biletin tulǵa retinde qalyptastyrady.
Qyzyǵýshylyqty qalai oiatýǵa bolady?
1. Úlgi bolyńyz
Bala eń aldymen ata-ananyń is-áreketine qaraidy. Eger siz únemi kitap oqyp otyrsańyz, bala ony erte me, kesh pe qaitalaidy. Keshki ýaqytta 10-15 minýtty birge kitap oqýǵa arnańyz.
2. Balanyń jasyna sai kitap tańdańyz
Keide balalar kitapty qyzyqsyz dep sanaidy. Sebebi ol kitap onyń jasyna nemese qyzyǵýshylyǵyna sáikes kelmeidi. 5-7 jastaǵy balaǵa qysqa, sýretti ertegiler, al bastaýysh synyp oqýshysyna tanymdyq áńgimeler, qyzyqty oqiǵalarǵa toly kitaptar unaidy.
3. Birge talqylańyz
Oqyǵan kitap boiynsha suraq qoiyp, oi bólisińiz. «Saǵan qai keiipker unady? Nelikten? Eger sen onyń ornynda bolsań, ne ister ediń?» degen suraqtar balanyń syni oilaýyn damytady.
4. Kitapty qoljetimdi etý
Úide balanyń óz buryshy bolsyn. Sol jerde onyń kitaptary jinaýly tursa, ol bos ýaqytynda ózi-aq oqýǵa den qoiady. Sondai-aq, kitaphanaǵa birge baryp turý da qyzyǵýshylyqty arttyrady.
Mektep kitaphanalary – jańa damý satysynda
Sońǵy jyldary balalardyń kitapqa qyzyǵýshylyǵyn oiatýǵa baǵyttalǵan júieli jumystar mektepter deńgeiinde de qolǵa alyndy. 2023 jyldan beri iske asyp jatqan «Balalar kitaphanasy» jobasy aiasynda mektep kitaphanalarynyń qory 1,6 million dana kórkem ádebietpen tolyqty. Búginde elimiz boiynsha jalpy kitap qory 141 million danadan asyp otyr.
Osy kitaptarǵa qoljetimdilikti jeńildetý úshin RFID tehnologiiasy engizilýde. Bul júie kitaptardy avtomatty túrde esepke alyp, oqyrman izdegen kitapty jedel tabýǵa múmkindik beredi. Sonymen qatar, 20-dan astam kitaphanada skanerleýshi robottar jumys istei bastady. Mundai zamanaýi ádister balalar úshin kitaphana keńistigin tartymdy, yńǵaily ári qyzyqty etedi.
Kitaphanashylardyń biliktiligi de nazardan tys qalmaýda. 2024 jyldyń ózinde 1 775 mektep kitaphanashysy arnaiy kýrstardan ótti, bul jumys 2025 jyly da jalǵasyn tabady. Bul – mektep kitaphanalaryn balalar úshin tek kitap sóreleri emes, shynaiy bilim men qarym-qatynas ortalyǵyna ainaldyrý jolyndaǵy mańyzdy qadam.
Bala kitapqa dostai qarasa, ol ómir boiy ózin damytýǵa umtylady. Al mektep pen otbasy birlese otyryp, oǵan durys baǵyt berse – kitap tek oqý quraly emes, bala ómirindegi senimdi serigine ainalady. Kitaphana men kitapqa degen súiispenshilik – tek balanyń emes, tutas ulttyń bolashaǵyna jasalǵan investitsiia.
