Memlekettik qaryzdy qaıtarý el búdjeti men qarjy júıesine aıtarlyqtaı salmaq salyp otyr. Qazir syrtqy bereshek 32 trıllıon teńge shamasynda. Soǵan qaramastan qarjy mınıstri alańdaýǵa esh negiz joq dep sanaıdy, dep habarlaıdy Dalanews.kz.
"Halyqaralyq sarapshylardyń aıtýynsha, bul joǵary deńgeı emes, ony basqarýǵa bolady. Memlekettik qaryz ósip jatyr, ony óteýge de qomaqty qarajat ketip jatyr. Biraq qazir barlyǵy bizdiń belgilengen lımıt aıasynda. 2024-2025 jyldary burynǵy oblıgasıa boıynsha qaryzdy qaıtarýdyń sharyqtaý kezeńi. Keıin memlekettik qaryzdyń deńgeıi turaqtalady. Ony azaıtý úshin birqatar shara qabyldanyp jatyr", deıdi QR Qarjy mınıstri Mádı Tákıev.
Mınıstr jańa salyq kodeksi arqyly tabysty arttyryp, búdjet tapshylyǵyn azaıtamyz degen ýáj aıtqanymen, senatorlar buǵan kelispeıdi. Dápýtattardy, ásirese, qaryzdyń kólemi men oǵan jumsalyp jatqan shyǵyn alańdatyp otyr. Byltyr memlekettik qaryzdy óteý men oǵan qyzmet kórsetýge 5 jarym trıllıon teńge jumsalǵan eken. Osynyń bárin eskere kele, qazirgi jaǵdaıdy qalypty dep baǵalaý orynsyz deıdi Senat tóraǵasy.
"Siz bári shekteýler aıasynda, bári durys deısiz, biraq biz búdjetti kórip otyrmyz. Búdjettiń naqty kirisiniń 42 paıyzy osy qaryzǵa baǵyttalǵan. Onyń teń jartysy — tek paıyzyn tóleýge ketken qarajat. Bul kórsetkish bizge nege bulaı bolyp jatqanyn, qalaı basqarý kerek ekenin tereńirek taldaýǵa negiz bolýy kerek", deıdi Senat tóraǵasy Máýlen Áshimbaev.
