Qazaqstannyń Saýda jáne integratsiia ministrligi keibir azyq-túlik taýarlarynyń qymbattaýyna qatysty qoǵamda týyndaǵan alańdaýshylyqqa túsinikteme berdi. Bul kúmándi pikirlerdiń týyndaýyna jýyrda jariialanǵan minimaldy baǵalar tizimi sebep bolǵan edi, dep habarlaidy Dalanews.kz.
Ministrliktiń resmi saitynda jariialanǵan málimetke sáikes, shilde-qyrkúiek aralyǵynda 11 túrli taýarǵa qatysty minimaldy baǵa deńgeii belgilenbek. Tizimge quramynda 80%-dan joǵary jáne tómen spirt, koniak, araq, jumyrtqa, un, eki sanattaǵy bidai, ashytqy, kúnbaǵys maiy siiaqty ónimder engen. Mysaly, araqtyń minimaldy baǵasy – 1136,16 teńge/litr, jumyrtqa – 37,8 teńge/dana, al qurǵaq ashytqy – 1376,56 teńge/kg dep kórsetilgen.
Ministrlik ókilderi bul baǵalardyń dúken sórelerindegi baǵaǵa esh qatysy joq ekenin atap ótti. Aitýlarynsha, bul tek import kezinde qosylǵan qun salyǵyn (QQS) esepteý úshin qoldanylatyn eseptik kórsetkish.
"Atalǵan tetik import kezinde salyq tóleýden jaltarmaýdyń aldyn alý úshin engizilgen. Minimaldy baǵa importtaýshynyń málimdegen baǵasy men otandyq óndirýshilerdiń baǵasynyń ortasha máni negizinde esepteledi. Bul kórsetkish tek QQS esepteý maqsatynda ǵana paidalanylady", – delingen vedomstvo habarlamasynda.
Ministrlik atap ótkendei, bul tizim alǵash ret 2021 jyly salyq organdarynyń bastamasymen bekitilgen jáne 2022 jyldyń 1 shildesinen bastap qoldanyla bastady. Baǵalar maýsymdyq aýytqýlar men syrtqy naryqtaǵy turaqsyzdyqty eskere otyryp, toqsanyna bir ret jańartylyp otyrady.
