قازاقستاننىڭ ساۋدا جانە ينتەگراسيا مينيسترلىگى كەيبىر ازىق-تۇلىك تاۋارلارىنىڭ قىمباتتاۋىنا قاتىستى قوعامدا تۋىنداعان الاڭداۋشىلىققا تۇسىنىكتەمە بەردى. بۇل كۇماندى پىكىرلەردىڭ تۋىنداۋىنا جۋىردا جاريالانعان مينيمالدى باعالار ءتىزىمى سەبەپ بولعان ەدى، دەپ حابارلايدى Dalanews.kz. 

مينيسترلىكتىڭ رەسمي سايتىندا جاريالانعان مالىمەتكە سايكەس، شىلدە-قىركۇيەك ارالىعىندا 11 ءتۇرلى تاۋارعا قاتىستى مينيمالدى باعا دەڭگەيى بەلگىلەنبەك. تىزىمگە قۇرامىندا 80%-دان جوعارى جانە تومەن سپيرت، كونياك، اراق، جۇمىرتقا، ۇن، ەكى ساناتتاعى بيداي، اشىتقى، كۇنباعىس مايى سياقتى ونىمدەر ەنگەن. مىسالى، اراقتىڭ مينيمالدى باعاسى – 1136،16 تەڭگە/ليتر، جۇمىرتقا – 37،8 تەڭگە/دانا، ال قۇرعاق اشىتقى – 1376،56 تەڭگە/كگ دەپ كورسەتىلگەن.

مينيسترلىك وكىلدەرى بۇل باعالاردىڭ دۇكەن سورەلەرىندەگى باعاعا ەش قاتىسى جوق ەكەنىن اتاپ ءوتتى. ايتۋلارىنشا، بۇل تەك يمپورت كەزىندە قوسىلعان قۇن سالىعىن (ققس) ەسەپتەۋ ءۇشىن قولدانىلاتىن ەسەپتىك كورسەتكىش.

"اتالعان تەتىك يمپورت كەزىندە سالىق تولەۋدەن جالتارماۋدىڭ الدىن الۋ ءۇشىن ەنگىزىلگەن. مينيمالدى باعا يمپورتتاۋشىنىڭ مالىمدەگەن باعاسى مەن وتاندىق وندىرۋشىلەردىڭ باعاسىنىڭ ورتاشا ءمانى نەگىزىندە ەسەپتەلەدى. بۇل كورسەتكىش تەك ققس ەسەپتەۋ ماقساتىندا عانا پايدالانىلادى"، – دەلىنگەن ۆەدومستۆو حابارلاماسىندا.

مينيسترلىك اتاپ وتكەندەي، بۇل ءتىزىم العاش رەت 2021 جىلى سالىق ورگاندارىنىڭ باستاماسىمەن بەكىتىلگەن جانە 2022 جىلدىڭ 1 شىلدەسىنەن باستاپ قولدانىلا باستادى. باعالار ماۋسىمدىق اۋىتقۋلار مەن سىرتقى نارىقتاعى تۇراقسىزدىقتى ەسكەرە وتىرىپ، توقسانىنا ءبىر رەت جاڭارتىلىپ وتىرادى.