"QazMunaiGaz" ulttyq kompaniiasy Mańǵystaý oblysyndaǵy áleýmettik ahýalǵa turaqty baqylaý júrgizip otyr. Al óńirde jii kóteriletin problemalardyń negizgi bóligi merdiger uiymdarmen bailanysty. Bul týraly ulttyq kompaniia basqarma tóraǵasynyń birinshi orynbasary Qurmanǵazy Isqaziev málimdedi, dep habarlaidy Dalanews.kz.
"Mańǵystaýdaǵy barlyq problemalyq jaǵdailar merdiger kompaniialar tarapynan týyndaidy. Olar — bizdiń enshiles uiymdarymyz emes, tek kelisimshart negizinde jumys isteitin jeke kompaniialar. Al biz áleýmettik turaqtylyqty qamtamasyz etip otyrmyz", — dedi Isqaziev "Samuryq-Qazyna" UÁQ Qoǵamdyq keńesiniń otyrysynda.
Onyń aitýynsha, "QazMunaiGaz" óndiristik kásiporyndarynda jaǵdai birqalypty.
"Másele — merdiger kompaniialarda. Olar bizben kelisimshartqa otyryp, keiin jumysshylardyń jalaqysyn bizdikimen teńestirýdi talap etedi. Áleýmettik jaǵdaidy da sol deńgeige kóterýdi qalaidy. Alaida bul jeke uiymdar. Kóbi bir nemese úsh jyldyq kelisimshartpen jumys isteidi", — dep túsindirdi Isqaziev.
Sondai-aq ol QMG men merdiger uiymdar arasynda dialog ornaǵanyn aityp ótti. Alaida eńbek ónimdiligi artpai, uńǵymalar jóndeý aralyǵy uzartylmasa, bolashaqta kompaniia kóptegen merdigerlerden bas tartatynyn eskertti. "QazMunaiGaz" kólem úshin emes, sapa úshin jumys isteýge múddeli ekenin atap ótti.
