"قازمۇنايگاز" ۇلتتىق كومپانياسى ماڭعىستاۋ وبلىسىنداعى الەۋمەتتىك احۋالعا تۇراقتى باقىلاۋ جۇرگىزىپ وتىر. ال وڭىردە ءجيى كوتەرىلەتىن پروبلەمالاردىڭ نەگىزگى بولىگى مەردىگەر ۇيىمدارمەن بايلانىستى. بۇل تۋرالى ۇلتتىق كومپانيا باسقارما ءتوراعاسىنىڭ ءبىرىنشى ورىنباسارى قۇرمانعازى يسقازييەۆ مالىمدەدى، دەپ حابارلايدى Dalanews.kz. 

"ماڭعىستاۋداعى بارلىق پروبلەمالىق جاعدايلار مەردىگەر كومپانيالار تاراپىنان تۋىندايدى. ولار — ءبىزدىڭ ەنشىلەس ۇيىمدارىمىز ەمەس، تەك كەلىسىمشارت نەگىزىندە جۇمىس ىستەيتىن جەكە كومپانيالار. ال ءبىز الەۋمەتتىك تۇراقتىلىقتى قامتاماسىز ەتىپ وتىرمىز"، — دەدى يسقازييەۆ "سامۇرىق-قازىنا" ءۇاق قوعامدىق كەڭەسىنىڭ وتىرىسىندا.

ونىڭ ايتۋىنشا، "قازمۇنايگاز" وندىرىستىك كاسىپورىندارىندا جاعداي ءبىرقالىپتى.

"ماسەلە — مەردىگەر كومپانيالاردا. ولار بىزبەن كەلىسىمشارتقا وتىرىپ، كەيىن جۇمىسشىلاردىڭ جالاقىسىن بىزدىكىمەن تەڭەستىرۋدى تالاپ ەتەدى. الەۋمەتتىك جاعدايدى دا سول دەڭگەيگە كوتەرۋدى قالايدى. الايدا بۇل جەكە ۇيىمدار. كوبى ءبىر نەمەسە ءۇش جىلدىق كەلىسىمشارتپەن جۇمىس ىستەيدى"، — دەپ ءتۇسىندىردى يسقازييەۆ.

سونداي-اق ول قمگ مەن مەردىگەر ۇيىمدار اراسىندا ديالوگ ورناعانىن ايتىپ ءوتتى. الايدا ەڭبەك ونىمدىلىگى ارتپاي، ۇڭعىمالار جوندەۋ ارالىعى ۇزارتىلماسا، بولاشاقتا كومپانيا كوپتەگەن مەردىگەرلەردەن باس تارتاتىنىن ەسكەرتتى. "قازمۇنايگاز" كولەم ءۇشىن ەمەس، ساپا ءۇشىن جۇمىس ىستەۋگە مۇددەلى ەكەنىن اتاپ ءوتتى.