Belgiialyq otbasy asyrap alǵan qazaq jigiti Jánibek Savelev kópshilikke buryn aitpaǵan ómirlik oqiǵasymen bólisti. Ol týǵan jeri Arqalyqqa barǵan saparynda biologiialyq anasy qaldyrǵan qoshtasý hatyn alǵanyn jáne keiin ony jazǵan áielmen kezdeskenin málimdedi.
Jánibek Savelev áleýmettik jelidegi paraqshasynda birneshe ai buryn Indoneziiaǵa jasaǵan saparynan estelikter jariialaýdy josparlap otyrǵanyn aitty. Sonymen qatar ol uzaq ýaqyt boiy ishinde saqtap kelgen, ómirine tikelei qatysty erekshe oqiǵany baiandaýǵa sheshim qabyldaǵan.
Onyń sózinshe, birneshe jyl buryn ózi dúniege kelgen Arqalyq qalasyndaǵy perzenthanaǵa arnaiy barǵan. Sol jerde kútpegen jańalyqqa tap bolǵan.
«Aralaryńyzda meniń birneshe jyl buryn týǵan jerim — Arqalyqtaǵy perzenthanaǵa barǵanymdy eske alatyndar bar shyǵar. Ol sapar men úshin erekshe mańyzdy edi. Ózim dúniege kelgen jerdiń dálizderin aralap júrgenimde, qolyma biologiialyq anamnyń men dúniege kelgen kezde qaldyrǵan qoshtasý hatyn berdi. Onyń bar ekenin osy ýaqytqa deiin bilmegen edim», – dep jazdy Jánibek.
Ol hatty alǵash oqyǵan sátte erekshe tolqyǵanyn jasyrmady. Sebebi bul jazba onyń ómiriniń alǵashqy kúnderinen qalǵan mańyzdy estelikterdiń biri bolǵan.
«Ol hatty alǵash oqyǵan sátte qandai kúide bolǵanymdy sózben jetkizý qiyn. Hattaǵy sózder men keibir málimetter júregimdi qatty tolqytty. Jyldar boiy túrli suraqtarǵa jaýap izdep, ómirimniń bastaýyn túsinýge tyrysyp júrdim. Al sol kúni ómirimniń alǵashqy kúnderinen qalǵan bir estelik qolyma tidi. Ony oqyp otyryp, kóz jasymdy ustai almadym», – dedi ol.
Jánibek hatty jazǵan áielmen Astanada kezdesken
Jánibektiń aitýynsha, hatty alǵannan keiin ol jazbanyń avtoryn izdestirýge kirisken. Izdeý jumystary nátijesinde hat qaldyrǵan áiel tabylyp, ekeýi Astanada júzdesken.
Bul kezdesý Jánibek úshin ómirindegi erekshe sátterdiń birine ainalǵan.
«Biz sol hatty jazǵan áieldi de izdei bastadyq. Aqyry, ony taptyq. Onymen Astanada kezdestik. Bul kezdesý men úshin óte erekshe ári júregime tereń áser qaldyrdy», – dep jazdy ol.
Alaida Jánibek kezdesýdiń barlyq mán-jaiyn ázirge jariia etpegen. Ol bul oqiǵanyń jalǵasy bar ekenin jáne ony kópshilikke birtindep aityp beretinin jetkizdi.
«Sol kezdesýden keiingi oqiǵalardy osy ýaqytqa deiin sizderge aityp kórmeppin. Óitkeni bul oqiǵanyń jalǵasy da bar, ári onyń bárin birden aityp jetkizý ońai emes», – dedi Jánibek.
Sondai-aq ol óziniń týǵan jerin, shyqqan tegin izdeý jolynda qoldaý kórsetken qazaqstandyqtarǵa alǵysyn bildirdi.
Jánibek Savelev aldaǵy kúnderi Indoneziia saparynan sýretter jariialap, týǵan anasynyń hatyna bailanysty oqiǵanyń qalai órbigenin de baiandaýǵa ýáde berdi.
Aita keteiik, Belgiiada ósken Jánibek Savelev buǵan deiin Qazaqstanǵa kelip, óziniń biologiialyq otbasyn izdeýimen kópshilikke tanylǵan bolatyn. Onyń taǵdyry men týǵan anasyn izdeý oqiǵasy qazaqstandyqtardyń nazaryn aýdarǵan.