2025 jylǵy 20 maýsymda Sankt-Peterbýrg halyqaralyq ekonomıkalyq forýmy aıasynda Qazaqstan Respýblıkasynyń Atom energıasy agenttiginiń tóraǵasy Almasadam Sátqalıev pen "Rosatom" memlekettik korporasıasynyń bas dırektory Alekseı Lıhachóv Qazaqstan Respýblıkasynda atom elektr stansıasyn salý jobasyn iske asyrý máseleleri boıynsha kezdesý ótkizdi, dep habarlaıdy Dalanews.kz.
Kezdesý barysynda jobany daıyndaý jáne iske asyrý kezeńderin qamtıtyn ındıkatıvtik jol kartasy bekitildi. Qujatta ınjenerlik-izdestirý jumystaryn júrgizý, EPC-shart jasasý jáne jobalyq qujattamany ázirleý kózdelgen.
Sondaı-aq, "Qazaqstandyq atom elektr stansıalary" JSHS ("QAES") men "Rosatom" memlekettik korporasıasynyń ınjınırıńtik kompanıasy – "Atomstroıeksport" AQ arasynda Almaty oblysynyń Jambyl aýdanynda jobany iske asyrýǵa baılanysty yntymaqtastyqtyń negizgi qaǵıdattaryn aıqyndaıtyn negizdemelik kelisimge qol qoıyldy.
Atalǵan strategıalyq joba beıbit maqsattaǵy atom energıasyn paıdalaný salasyndaǵy memleketaralyq yntymaqtastyq aıasynda júzege asyrylady jáne Qazaqstannyń energetıkalyq qaýipsizdigin qamtamasyz etý men el ekonomıkasyn dekarbonızasıalaý jónindegi strategıalyq mindetterge qol jetkizýge baǵyttalǵan. Taraptar bul jobanyń elimiz úshin strategıalyq mańyzdylyǵyn jáne ony jedel iske asyrý qajettigin atap ótti.
"Qazaqstanda atom elektr stansıasyn salatyn halyqaralyq konsorsıýmdy basqarý quqyǵyn senip tapsyrǵany úshin Qazaqstan tarapyna alǵysymyzdy bildiremiz. Qazaqstan – atom salasyndaǵy bizdiń senimdi tarıhı seriktesimiz. Senimdiligi, qaýipsizdigi jáne tıimdiligi dáleldengen reseılik ıadrolyq tehnologıalar Qazaqstan halqynyń ıgiligine qyzmet etip, eldiń energetıkalyq egemendigin nyǵaıtady dep senemiz", – dedi "Rosatom" memlekettik korporasıasynyń bas dırektory Alekseı Lıhachóv.
Almas Sátqalıevtiń aıtýynsha, Qazaqstanda atom stansıasyn salý – elimizdiń energetıkasyn ornyqty damytýdy qamtamasyz etýge baǵyttalǵan keshendi strategıanyń bir bóligi.
"Biz qaýipsizdiktiń joǵary deńgeıin jáne óndiristi jergiliktendirýdi qamtamasyz etý úshin seriktesterimizben tyǵyz ári ashyq yntymaqtastyqqa senim artamyz", – dep atap ótti Qazaqstan Respýblıkasynyń Atom energıasy jónindegi agenttiginiń tóraǵasy Almasadam Sátqalıev.
Aıta ketsek, "Rosatom" memlekettik atom energıasy korporasıasy – energetıka, mashına jasaý, qurylys jáne ózge de salalardaǵy aktıvterdi biriktiretin kópsalaly holdıń. Korporasıa AES salý boıynsha álemdegi eń iri tapsyrystar portfeline ıe: qazirgi tańda 10 elde túrli kezeńderde 39 energetıkalyq bloktyń (onyń ishinde 6 shaǵyn qýatty blok) qurylysy júrgizilýde.
Buǵan deıin Qazaqstanda qolǵa alynbaq alǵashqy AES-tiń qurylysy qashan aıaqtalýy múmkin ekeni aıtylǵan. Agenttiktiń málimetinshe,álemdik tájirıbe kórsetkendeı, atom elektr stansıasyn jobalaý, salý jáne paıdalanýǵa berý merzimi 10-12 jyldy quraıdy. Osy jaǵynan alǵanda, AES qurylysyn aıaqtaýdyń boljamdy merzimi - 2035-2036 jyldar. "Rosatom" MK da osy josparǵa súıenetinderin rastapty.
