«Jumysshy mamandyqtar jyly» aiasynda Túrkistan oblysynda kolledj túlekterine arnalǵan «Adal azamat, adal eńbek, adal tabys» atty forým ótti. Is-shara barysynda kásiporyndardyń óndiristik áleýeti tanystyrylyp, tehnikalyq jáne kásiptik bilim berý uiymynyń túlekterine arnalǵan kásiptik baǵdar berý kezdesýleri ótkizildi. Sonymen birge bos jumys oryndarynyń jármeńkesi uiymdastyrylyp, óńirdegi jáne respýblikalyq deńgeidegi iri kásiporyndar jastar men jumys izdeýshilerdi jumysqa qabyldady, dep habarlaidy Dalanews.kz
Mańyzdy is-sharaǵa Túrkistan oblysynyń ákimi Nuralhan Kósherov arnaiy qatysyp, jastardy jumyspen qamtý – basym baǵyttardyń biri ekenin aitty.
– Bul – jai jiyn emes, eńbekke adamyna degen qurmet. Memleket basshysy Qasym-Jomart Kemeluly Toqaev 2025 jyldy «Jumysshy mamandyqtar jyly» dep jariialady. Búgingi forýmnyń basty ideiasy – jumysshy mamandyqtardyń bedelin arttyrý. Bul – jastar men jumys berýshiler arasyndaǵy mańyzdy alań. Osy rette jas mamandardy jumys oryndarymen qamtamasyz etip otyrǵan kásipkerlerge erekshe alǵysymdy bildiremin. Túrkistan oblysy – eńbekqor jandar mekeni. Halqymyzdyń sany 2 millionnan asty, sonyń 660 myńǵa jýyǵy – jastar. Jastardyń bolashaǵy – sapaly bilim men kásibi daiyndyqqa tikelei bailanysty. Biyl 12 myńdai kolledj túlegi maman atanyp, eńbek jolyna qadam basty. Olar 50 kolledjde 75 túrli mamandyq boiynsha bilim aldy. Búginde kolledjder 700-ge jýyq kásiporynmen tikelei áriptestik ornatyp otyr. Bul – biznes pen bilimniń birlesken jetistigi. Biylǵy oqý jylyna kolledjderge 15500 orynǵa memlekettik tapsyrys berildi. Jańadan 6 jumysshy mamandyǵyna litsenziia alyndy. Kolledj túlekterin jumyspen qamtý basty nazarda bolady, – dedi Nuralhan Kósherov.
Aýqymdy is-sharany Oblystyq bilim basqarmasy men Oblystyq jumyspen qamtýdy úilestirý jáne áleýmettik baǵdarlamalar basqarmasy jáne oblystyq «Eńbek mobildiligi ortalyǵy» KMM birlesip uiymdastyrdy.
Is-sharada jastardy jumyspen qamtý maqsatynda oblystaǵy iri kásiporyndar men tehnikalyq jáne kásiptik bilim berý uiymdary jáne «Eńbek mobildiligi ortalyǵy» arasynda 3 jaqty ózara yntymaqtastyq Memorandýmdary túzildi.
Jármeńkege Túrkistan oblysy boiynsha 40-tan asa jumys berýshi qatysyp, 1 500-den astam bos jumys ornyn usyndy. Túlekterge áleýmettik áriptester tarapynan jumysqa ornalastyrý sertifikattary tabystaldy.
Kásiporyndar óz jumystaryn nasihattap, talapqa sai mamandyǵy, bilimi, tipti jumys tájiribesi joq azamattar da ózine laiyqty qyzmet túrin tabýǵa múmkindik aldy. Olardyń qatarynda «Kazakhstan Lihua» JShS – 300, «Ideal Týrkestan» JShS – 55, «PSI Mineral Technologies» JShS – 150, «Altyn Land» JShS – 85, «Kaz Eco Meat» JShS – 90, «Kuzov Karabulak» JShS – 440 jumys ornyn usyndy. Sondai-aq, «Silk Way International», «QazEcoPack», «A.B.L Fitness and Spa», «Baspolymer», «Er-Qan Group», «High School Zhetisay», «KazatomProm-SaUran», «ÝRANQÝAT» jáne basqa da kásiporyndar belsendilik tanytyp, jastarǵa qoldaý bildirdi.
Usynylǵan bos jumys oryndarynyń 75% nemese 1 163-i – ónerkásip salasyndaǵy iske asyrylyp jatqan investitsiialyq jobalardyń úlesinde, 162-si aýyl sharýshylǵy salasyna tiesili. 2 myńnan astam jumys izdeýshige injener, aýdarmashy, esepshi, zańger, mehanik, elektrik, dánekerleýshi, jumysshy, operator, tehnolog, júrgizýshi, pedagog, tárbieshi, tiginshi, aspaz, laborant, kúzetshi, qasapshy, IT-maman, programmist jáne ózge de 100-den astam mamandyqtar usynyldy.
Sonymen qatar bos jumys oryndary jármeńkesinde Soltústik óńirlerge qonys aýdarýmen ainalysatyn «Táýekel» qoǵamdyq uiymynyń tóraǵasy Býrahan Dahanov bastaǵan Soltústik Qazaqstan oblysynyń bir top jumys berýshileri qonys aýdarýǵa niet bildirgender arasynda memleket tarapynan kórsetiletin qoldaýlardy túsindirdi.
Aita keteiik, Túrkistan oblysynda kolledj stýdentteriniń, jalpy turǵyndardyń jumyspen qamtylýyna qolaily jaǵdai jasalyp keledi. 10 myńnan astam stýdent naqty óndiris oryndarynda, kásiporyndarda tájiribe jinaqtady. 2024 jylǵy túlekterdiń jumyspen qamtylý kórsetkishi 75%-ǵa jetti. 700-dei kásiporynmen kolledjder naqty áriptestik ornatyp otyr.
Biylǵy alǵashqy bes aida oblysta 43 378 adam jumyspen qamtyldy. Onyń 20 myńnan astamy – jumysshy mamandyq ieleri. Ulttyq jobalar aiasynda 1653 azamat jumysqa ornalasty. Jeke investitsiia arqyly 621 jańa jumys orny quryldy. «10 myń turǵynǵa – 100 jańa jumys orny» jobasy boiynsha 5 myńǵa jýyq jumys oryndary ashylǵan.
