«جۇمىسشى ماماندىقتار جىلى» اياسىندا تۇركىستان وبلىسىندا كوللەدج تۇلەكتەرىنە ارنالعان «ادال ازامات، ادال ەڭبەك، ادال تابىس» اتتى فورۋم ءوتتى. ءىس-شارا بارىسىندا كاسىپورىنداردىڭ وندىرىستىك الەۋەتى تانىستىرىلىپ، تەحنيكالىق جانە كاسىپتىك ءبىلىم بەرۋ ۇيىمىنىڭ تۇلەكتەرىنە ارنالعان كاسىپتىك باعدار بەرۋ كەزدەسۋلەرى وتكىزىلدى. سونىمەن بىرگە بوس جۇمىس ورىندارىنىڭ جارمەڭكەسى ۇيىمداستىرىلىپ، وڭىردەگى جانە رەسپۋبليكالىق دەڭگەيدەگى ءىرى كاسىپورىندار جاستار مەن جۇمىس ىزدەۋشىلەردى جۇمىسقا قابىلدادى، دەپ حابارلايدى Dalanews.kz
ماڭىزدى ءىس-شاراعا تۇركىستان وبلىسىنىڭ اكىمى نۇرالحان كوشەروۆ ارنايى قاتىسىپ، جاستاردى جۇمىسپەن قامتۋ – باسىم باعىتتاردىڭ ءبىرى ەكەنىن ايتتى.
– بۇل – جاي جيىن ەمەس، ەڭبەككە ادامىنا دەگەن قۇرمەت. مەملەكەت باسشىسى قاسىم-جومارت كەمەل ۇلى توقايەۆ 2025 جىلدى «جۇمىسشى ماماندىقتار جىلى» دەپ جاريالادى. بۇگىنگى فورۋمنىڭ باستى يدەياسى – جۇمىسشى ماماندىقتاردىڭ بەدەلىن ارتتىرۋ. بۇل – جاستار مەن جۇمىس بەرۋشىلەر اراسىنداعى ماڭىزدى الاڭ. وسى رەتتە جاس مامانداردى جۇمىس ورىندارىمەن قامتاماسىز ەتىپ وتىرعان كاسىپكەرلەرگە ەرەكشە العىسىمدى بىلدىرەمىن. تۇركىستان وبلىسى – ەڭبەكقور جاندار مەكەنى. حالقىمىزدىڭ سانى 2 ميلليوننان استى، سونىڭ 660 مىڭعا جۋىعى – جاستار. جاستاردىڭ بولاشاعى – ساپالى ءبىلىم مەن كاسىبي دايىندىققا تىكەلەي بايلانىستى. بيىل 12 مىڭداي كوللەدج تۇلەگى مامان اتانىپ، ەڭبەك جولىنا قادام باستى. ولار 50 كوللەدجدە 75 ءتۇرلى ماماندىق بويىنشا ءبىلىم الدى. بۇگىندە كوللەدجدەر 700-گە جۋىق كاسىپورىنمەن تىكەلەي ارىپتەستىك ورناتىپ وتىر. بۇل – بيزنەس پەن ءبىلىمنىڭ بىرلەسكەن جەتىستىگى. بيىلعى وقۋ جىلىنا كوللەدجدەرگە 15500 ورىنعا مەملەكەتتىك تاپسىرىس بەرىلدى. جاڭادان 6 جۇمىسشى ماماندىعىنا ليسەنزيا الىندى. كوللەدج تۇلەكتەرىن جۇمىسپەن قامتۋ باستى نازاردا بولادى، – دەدى نۇرالحان كوشەروۆ.
اۋقىمدى ءىس-شارانى وبلىستىق ءبىلىم باسقارماسى مەن وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى جانە وبلىستىق «ەڭبەك موبيلدىلىگى ورتالىعى» كمم بىرلەسىپ ۇيىمداستىردى.
ءىس-شارادا جاستاردى جۇمىسپەن قامتۋ ماقساتىندا وبلىستاعى ءىرى كاسىپورىندار مەن تەحنيكالىق جانە كاسىپتىك ءبىلىم بەرۋ ۇيىمدارى جانە «ەڭبەك موبيلدىلىگى ورتالىعى» اراسىندا 3 جاقتى ءوزارا ىنتىماقتاستىق مەموراندۋمدارى ءتۇزىلدى.
جارمەڭكەگە تۇركىستان وبلىسى بويىنشا 40-تان اسا جۇمىس بەرۋشى قاتىسىپ، 1 500-دەن استام بوس جۇمىس ورنىن ۇسىندى. تۇلەكتەرگە الەۋمەتتىك ارىپتەستەر تاراپىنان جۇمىسقا ورنالاستىرۋ سەرتيفيكاتتارى تابىستالدى.
كاسىپورىندار ءوز جۇمىستارىن ناسيحاتتاپ، تالاپقا ساي ماماندىعى، ءبىلىمى، ءتىپتى جۇمىس تاجىريبەسى جوق ازاماتتار دا وزىنە لايىقتى قىزمەت ءتۇرىن تابۋعا مۇمكىندىك الدى. ولاردىڭ قاتارىندا «Kazakhstan Lihua» ج ش س – 300، «يدەال تۋركەستان» ج ش س – 55، «PSI Mineral Technologies» ج ش س – 150، «Altyn Land» ج ش س – 85، «Kaz Eco Meat» ج ش س – 90، «Kuzov Karabulak» ج ش س – 440 جۇمىس ورنىن ۇسىندى. سونداي-اق، «Silk Way International»، «QazEcoPack»، «A.B.L Fitness and Spa»، «Baspolymer»، «Er-Qan Group»، «High School Zhetisay»، «KazatomProm-SaUran»، «ۋرانقۋات» جانە باسقا دا كاسىپورىندار بەلسەندىلىك تانىتىپ، جاستارعا قولداۋ ءبىلدىردى.
ۇسىنىلعان بوس جۇمىس ورىندارىنىڭ 75% نەمەسە 1 163ء-ى – ونەركاسىپ سالاسىنداعى ىسكە اسىرىلىپ جاتقان ينۆەستيسيالىق جوبالاردىڭ ۇلەسىندە، 162ء-سى اۋىل شارۋشىلعى سالاسىنا تيەسىلى. 2 مىڭنان استام جۇمىس ىزدەۋشىگە ينجەنەر، اۋدارماشى، ەسەپشى، زاڭگەر، مەحانيك، ەلەكتريك، دانەكەرلەۋشى، جۇمىسشى، وپەراتور، تەحنولوگ، جۇرگىزۋشى، پەداگوگ، تاربيەشى، تىگىنشى، اسپاز، لابورانت، كۇزەتشى، قاساپشى، IT-مامان، پروگرامميست جانە وزگە دە 100-دەن استام ماماندىقتار ۇسىنىلدى.
سونىمەن قاتار بوس جۇمىس ورىندارى جارمەڭكەسىندە سولتۇستىك وڭىرلەرگە قونىس اۋدارۋمەن اينالىساتىن «تاۋەكەل» قوعامدىق ۇيىمىنىڭ ءتوراعاسى بۋراحان داحانوۆ باستاعان سولتۇستىك قازاقستان وبلىسىنىڭ ءبىر توپ جۇمىس بەرۋشىلەرى قونىس اۋدارۋعا نيەت بىلدىرگەندەر اراسىندا مەملەكەت تاراپىنان كورسەتىلەتىن قولداۋلاردى ءتۇسىندىردى.
ايتا كەتەيىك، تۇركىستان وبلىسىندا كوللەدج ستۋدەنتتەرىنىڭ، جالپى تۇرعىنداردىڭ جۇمىسپەن قامتىلۋىنا قولايلى جاعداي جاسالىپ كەلەدى. 10 مىڭنان استام ستۋدەنت ناقتى ءوندىرىس ورىندارىندا، كاسىپورىنداردا تاجىريبە جيناقتادى. 2024 جىلعى تۇلەكتەردىڭ جۇمىسپەن قامتىلۋ كورسەتكىشى 75%-عا جەتتى. 700-دەي كاسىپورىنمەن كوللەدجدەر ناقتى ارىپتەستىك ورناتىپ وتىر.
بيىلعى العاشقى بەس ايدا وبلىستا 43 378 ادام جۇمىسپەن قامتىلدى. ونىڭ 20 مىڭنان استامى – جۇمىسشى ماماندىق يەلەرى. ۇلتتىق جوبالار اياسىندا 1653 ازامات جۇمىسقا ورنالاستى. جەكە ينۆەستيسيا ارقىلى 621 جاڭا جۇمىس ورنى قۇرىلدى. «10 مىڭ تۇرعىنعا – 100 جاڭا جۇمىس ورنى» جوباسى بويىنشا 5 مىڭعا جۋىق جۇمىس ورىندارى اشىلعان.
