Bek Air áýe kompanıasynyń balansynda qalǵan eki Fokker-100 ushaǵy aýksıon arqyly satylmaq, dep habarlaıdy Dalanews.kz.
Aýksıonǵa bastapqy baǵa – 104 mıllıon teńge. Baǵalaý quny boıynsha, ushaqtardyń bireýi – 69,4 mln teńge, ekinshisi – 35 mln teńge turady.
Tehnıkalyq jaǵdaıy men saýda sharttary
Aýksıon 26 maýsym kúni saǵat 11:00-de bastalady. Qatysýǵa ótinishti aýksıon bastalardan eki saǵat burynǵa deıin berýge bolady. F1018 jáne F1019 borttyq nómirleri bar bul ushaqtar shartty túrde jaramdy kúıde. Alaıda kedendik bereshekke baılanysty olardy tolyqtaı paıdalanýǵa shekteý qoıylǵan.
Ushaqtardyń biri Panamada tirkelgen kompanıadan 1,7 mln dollarǵa, ekinshisi Germanıadan 850 myń dollarǵa satyp alynǵan. Ekeýi de 1990 jyldardyń basynda óndirilgen.
Kompanıanyń qazirgi qarjylyq jaǵdaıy
2024 jyldyń aınalym-qaldyq vedomosyna sáıkes, kompanıanyń balansynda qalǵan eń qundy aktıv osy eki ushaq. Degenmen olardyń balanstyq quny 20 mıllıon teńgeden aspaıdy. Jyl sońyndaǵy jalpy saldo – 38,5 mıllıon teńge.
Bek Air apaty týraly
2019 jylǵy 27 jeltoqsanda Bek Air áýe kompanıasynyń Fokker-100 ushaǵy Almatydan elordaǵa ushyp shyǵýy tıis bolatyn. Alaıda ushaq bıiktikke kóterile almaı, jerge soǵylyp, dóńgeleksiz syrǵanaı kele áýejaı qorshaýyn buzyp, Almaty mańyndaǵy aıaqtalmaǵan jeke úıge soǵyldy.
Ushaq bortynda 93 jolaýshy men 5 ekıpaj múshesi bolǵan. Apat saldarynan 12 adam qaza taýyp, 47 adam jaraqat aldy.
Bir aıdan soń, aman qalǵan ekinshi ushqysh Mırjan Muldaqulov tromb úzilip ketken soń úıinde kóz jumdy.
2021 jyly Talǵar aýdandyq soty Almaty áýejaıynyń mańyndaǵy jer telimderin zańsyz satqan rıeltor men jergilikti sheneýnikterge úkim shyǵardy. Olar 2,5 jyldan 4 jylǵa deıin bas bostandyǵynan aıyryldy.
