Memleket basshysy Qasym-Jomart Toqaev Qazaqstan halqyna Joldaýynda jer qatynastaryna qatysty túıtkilderdi sheshý jóninde birqatar naqty tapsyrma berdi. Prezıdenttiń aıtýynsha, aýyl sharýashylyǵy jerleriniń bar ıgiligi eldiń damýyna jáne halyqtyń turmysyn jaqsartýǵa jumsalýy kerek, dep habarlaıdy Dalanews.kz.
«Men ıgerilmeı bos jatqan jáne zańsyz alynǵan aýyl sharýashylyǵy jerlerin keri qaıtaryp, ony qaıta bólý týraly tapsyrma berdim. Jer ıesiz qalmaýǵa tıis, jerdi tek qana onyń qadirin biletin azamattarǵa berý kerek», – dedi Toqaev.
Onyń dereginshe, 2022 jyldan beri jalpy aýmaǵy 13,5 mıllıon gektardan astam jer memleket menshigine qaıtarylǵan. Alaıda ákimdikter sonyń tek 6 mıllıon gektaryn ǵana jańa jer ıgerýshilerge bólip úlgergen.
«Iesin tapqan jer óndiristiń oshaǵyna, ınvestısıa kózine, qaınaǵan eńbektiń ortasyna aınalýy qajet. Bul – anyq nárse», – dep atap ótti Prezıdent.
Osyǵan baılanysty óńir ákimderine qaıtarylǵan jerdiń bárin kelesi jyldyń ortasyna deıin turaqty aınalymǵa engizý tapsyryldy. Bul shara jaıylym tapshylyǵyn sheshýge de múmkindik beredi.
Sonymen qatar Memleket basshysy jer qatynastaryna qatysty zańsyzdyq pen qaǵazbastylyqty joıýdyń mańyzdylyǵyna toqtaldy.
«Aýyl sharýashylyǵy jerlerin bólý tásilderin túbegeıli ózgertý kerek. Jerdi bólýge qatysty sheshim sıfrlyq formatta, elektrondy konkýrstar arqyly qabyldanýǵa tıis. Úkimet jyl sońyna deıin zańnamaǵa tıisti ózgertýler usynýy qajet», – dedi ol.
Prezıdent bul salada sıfrlyq tehnologıalardy keńinen qoldaný qajettigin de erekshe atap ótti. Búginde kosmomonıtorıng pen geotaldaý júıesi paıdalanylmaı jatqan jerlerdi anyqtaýǵa septigin tıgizýde. Endi jasandy ıntellekt arqyly jerdiń sapasyna, eginniń shyǵymyna jáne daqyldardyń jaı-kúıine tereń taldaý jasalatyn bolady.
Memleket basshysy bul tásil orman sharýashylyǵyna da qatysty ekenin eske saldy. Máselen, Soltústik Qazaqstan oblysynda 9 myń gektar ormannyń ıesiz jatqany anyqtalǵan.
Sondaı-aq Prezıdent biryńǵaı sıfrlyq jer kartasyn ázirleýdi tapsyrdy. Bul júıege kadastrlyq málimettermen birge ınfraqurylym jáne jer qoınaýyn paıdalanýǵa qatysty aqparat ta engizilmek.
