Memleket basshysy Qasym-Jomart Toqaev Qazaqstan halqyna Joldaýynda óńirlerge investitsiia tartý máselesine toqtalyp, arnaiy ekonomikalyq aimaqtardyń (AEA) jumysyn túbegeili qaita qaraý qajettigin aitty, dep habarlaidy Dalanews.kz.
Prezidenttiń aitýynsha, AEA el ekonomikasynda mańyzdy ról atqarýǵa tiis bolǵanymen, olardyń kóbiniń jumysy áli de mardymsyz.
«Úkimet arnaiy ekonomikalyq aimaqtardyń tiimdiligin arttyrý úshin tereń saraptama jasap, túbegeili sharalar qabyldaýǵa daiyn bolýy kerek. Arnaiy aimaqtardy basqarýǵa jeke kompaniialardy, qajet bolsa, sheteldik investorlardy tartýǵa bolady», – dedi Toqaev.
Sondai-aq Memleket basshysy áleýmettik-kásipkerlik korporatsiialardyń qazirgi jumysyna syn aitty. Onyń pikirinshe, bul uiymdar aimaqtyq ekonomikany ilgeriletýdiń ornyna kommýnaldyq múlikti basqarý men usaq jobalarǵa ǵana nazar aýdaryp otyr.
«Úkimet osyndai korporatsiialardy tolyqqandy damý institýtyna ainaldyrýy tiis», – dep tapsyrma berdi Prezident.
Qasym-Jomart Toqaev investitsiia tartý tek ortalyq organdardyń emes, jergilikti biliktiń de basty mindeti ekenin atap ótti.
«Ákimderdiń aimaqtaǵy investitsiialyq ahýalǵa tikelei jaýapkershiligin belgileý kerek», – dedi ol.
Sonymen qatar Strategiialyq josparlaý jáne reformalar agenttigine aimaqtardyń investitsiialyq tartymdylyq indeksin engizý tapsyryldy. Bul iske táýelsiz sarapshylardy tartý múmkindigi de qarastyrylmaq.
Prezident óz sózinde infliatsiia máselesine de toqtaldy. Onyń aitýynsha, joǵary baǵa ósimi ekonomikalyq kórsetkishter men halyqtyń tabysyn «jutyp jatyr».
«Bul másele kóptegen memleketke ortaq, biraq bizde airyqsha sezilip otyr. Qiyndyqtar keshe ǵana paida bolǵan joq. Sheshim qabyldaý úshin álemdegi ozyq tájiribelerge súienip, qajet bolǵan jaǵdaida halyqqa unai bermeitin sharalarǵa barýǵa da daiyn bolýymyz kerek», – dedi Toqaev.
Osy rette Memleket basshysy Úkimet pen Ulttyq bankke birtutas komanda retinde jumys isteýdi tapsyrdy.
«Qazir árkim kórpeni ózine qarai tartatyn kez emes», – dep qadap aitty Prezident.
