مەملەكەت باسشىسى قاسىم-جومارت توقايەۆ قازاقستان حالقىنا جولداۋىندا وڭىرلەرگە ينۆەستيسيا تارتۋ ماسەلەسىنە توقتالىپ، ارنايى ەكونوميكالىق ايماقتاردىڭ (اەا) جۇمىسىن تۇبەگەيلى قايتا قاراۋ قاجەتتىگىن ايتتى، دەپ حابارلايدى Dalanews.kz.
پرەزيدەنتتىڭ ايتۋىنشا، اەا ەل ەكونوميكاسىندا ماڭىزدى ءرول اتقارۋعا ءتيىس بولعانىمەن، ولاردىڭ كوبىنىڭ جۇمىسى ءالى دە ماردىمسىز.
«ۇكىمەت ارنايى ەكونوميكالىق ايماقتاردىڭ تيىمدىلىگىن ارتتىرۋ ءۇشىن تەرەڭ ساراپتاما جاساپ، تۇبەگەيلى شارالار قابىلداۋعا دايىن بولۋى كەرەك. ارنايى ايماقتاردى باسقارۋعا جەكە كومپانيالاردى، قاجەت بولسا، شەتەلدىك ينۆەستورلاردى تارتۋعا بولادى»، – دەدى توقايەۆ.
سونداي-اق مەملەكەت باسشىسى الەۋمەتتىك-كاسىپكەرلىك كورپوراسيالاردىڭ قازىرگى جۇمىسىنا سىن ايتتى. ونىڭ پىكىرىنشە، بۇل ۇيىمدار ايماقتىق ەكونوميكانى ىلگەرىلەتۋدىڭ ورنىنا كوممۋنالدىق مۇلىكتى باسقارۋ مەن ۇساق جوبالارعا عانا نازار اۋدارىپ وتىر.
«ۇكىمەت وسىنداي كورپوراسيالاردى تولىققاندى دامۋ ينستيتۋتىنا اينالدىرۋى ءتيىس»، – دەپ تاپسىرما بەردى پرەزيدەنت.
قاسىم-جومارت توقايەۆ ينۆەستيسيا تارتۋ تەك ورتالىق ورگانداردىڭ ەمەس، جەرگىلىكتى بيلىكتىڭ دە باستى مىندەتى ەكەنىن اتاپ ءوتتى.
«اكىمدەردىڭ ايماقتاعى ينۆەستيسيالىق احۋالعا تىكەلەي جاۋاپكەرشىلىگىن بەلگىلەۋ كەرەك»، – دەدى ول.
سونىمەن قاتار ستراتەگيالىق جوسپارلاۋ جانە رەفورمالار اگەنتتىگىنە ايماقتاردىڭ ينۆەستيسيالىق تارتىمدىلىق يندەكسىن ەنگىزۋ تاپسىرىلدى. بۇل ىسكە تاۋەلسىز ساراپشىلاردى تارتۋ مۇمكىندىگى دە قاراستىرىلماق.
پرەزيدەنت ءوز سوزىندە ينفلياسيا ماسەلەسىنە دە توقتالدى. ونىڭ ايتۋىنشا، جوعارى باعا ءوسىمى ەكونوميكالىق كورسەتكىشتەر مەن حالىقتىڭ تابىسىن «جۇتىپ جاتىر».
«بۇل ماسەلە كوپتەگەن مەملەكەتكە ورتاق، ءبىراق بىزدە ايرىقشا سەزىلىپ وتىر. قيىندىقتار كەشە عانا پايدا بولعان جوق. شەشىم قابىلداۋ ءۇشىن الەمدەگى وزىق تاجىريبەلەرگە سۇيەنىپ، قاجەت بولعان جاعدايدا حالىققا ۇناي بەرمەيتىن شارالارعا بارۋعا دا دايىن بولۋىمىز كەرەك»، – دەدى توقايەۆ.
وسى رەتتە مەملەكەت باسشىسى ۇكىمەت پەن ۇلتتىق بانككە ءبىرتۇتاس كوماندا رەتىندە جۇمىس ىستەۋدى تاپسىردى.
«ءقازىر اركىم كورپەنى وزىنە قاراي تارتاتىن كەز ەمەس»، – دەپ قاداپ ايتتى پرەزيدەنت.
