Qyzylorda oblysynyń ákimi Nurlybek Nálibaev Qorqyt ata skverin jańǵyrtý jáne jańa jylý-elektr ortalyǵynyń qurylys jumystarymen tanysty,- dep habarlaidy Dalanews.kz
Qorqyt ata skverin «Astana servis Ltd» JShS jyl sońynda paidalanýǵa bermek. Onda 157 oryndyq, 100 qoqys jáshigi, 85 jaryq baǵanasy ornatylyp, 9 500 sharshy metr aýmaqqa brýschatka tóseledi.
Sondai-aq, bul jerde balalar oiyn alańy, sýburqaq, serýendeýge arnalǵan saiabaq salynýda. Abattandyrý jumystary da keńinen júrgizilýde.
Memleket basshysynyń tapsyrmasyna sáikes ońtústik óńirlerde elektr energiiasynyń tapshylyǵyn boldyrmaý maqsatynda Qyzylorda qalasynda jańa jylý-elektr ortalyǵy qurylysy qarqyndy júrgizilýde. Jalpy quny 215 mlrd.teńge, investor «Aksa Energy» túrik kompaniiasy qurylysqa 147 mlrd.teńgeden astam investitsiia saldy.
Negizgi qondyrǵylar shet elden alynǵan. Qýatylyǵy 180 megavattyq 2 gaz týrbinalyq qondyrǵy, 95 megavattyq bý týrbinasy, 2 bý, 4 jylý qazandyǵyn qoiý josparlanǵan. Jergilikti óndirýshilerdiń materialdary da paidalanylýda.
Qazir negizgi qondyrǵylar tolyq jetkizilip ornatylýda. Búginde jumystyń 80 paiyzǵa jýyǵy bitti.
Budan bólek, biýdjet esebinen 15 mlrd. teńgege ortalyqqa deiin 45 shaqyrym gaz qubyry men avtomattandyrylǵan gaz taratý stantsiiasy salyndy.
Qurylys alańynda negizgi bóligi jergilikti turǵyndardan quralǵan 1200-den astam jumysshy jáne 130 arnaiy tehnika bar.
Stantsiiany aldaǵy IV toqsanda iske qosý josparlanǵan. Birinshi kezekte 1 gazotýrbinalyq qondyrǵy, 2 jylý qazandyǵy, kelesi jyly qalǵan qondyrǵylar qosylady. Jańa stantsiia oblystyń elektr energiiasyna degen qajettiligin tolyǵymen qamtamasyz etedi.
