Búgin oblys ákimi Murat Ergeshbaevtyń, QR Parlamenti Senaty men Májilisiniń depýtattary Rýslan Rústemov, Murat Ábenov, Marhabat Jaiymbetovtiń, máslihat depýtattary, ziialy qaýym ókilderi, el aǵalarynyń qatysýymen sol jaǵalaýdaǵy 10 turǵyn úi kesheniniń 600 páterin ielerine tabystaý rásimi ótti, dep habarlaidy dalanews.kz.
Qyzylorda qalasyndaǵy Syrdariia ózeniniń sol jaǵalaýy – keiingi jyldary erekshe qarqynmen damyǵan aýmaq. Munda áleýmettik nysandar men turǵyn úi sany jyl ótken saiyn artyp keledi. Osy aýmaqta zamanaýi ýrbanistikalyq sheshimder negizinde jaily ári qolaily infraqurylym qalyptasyp úlgerdi.
Búginde sol jaǵalaýda 169 nysan bar, 136 kópqabatty turǵyn úi paidalanýǵa berilip, myńdaǵan otbasy baspanaly boldy. Halyqqa qolaily orta qalyptastyrý maqsatynda 20 áleýmettik jáne 13 biznes nysany jumys isteidi.
Qazirgi ýaqytta munda 47 qurylys salynyp jatyr. Onyń 25-i –kópqabatty turǵyn úi, 20-sy –kásipkerlik nysan, bir aýrýhana jáne bir emhana. Turǵyndardyń qaýipsiz jol qozǵalysyn uiymdastyrý maqsatynda Isa Toqtybaev kóshesinen sol jaǵalaýǵa ótetin tórt jolaqty jańa avtomobil kópirin salý josparlanǵan.
Jańa shaǵyn aýdan turǵyndarynyń sany 25 myńnan asty, mektep, balabaqsha, saýda oryndary halyq suranysyna sai qyzmet kórsetedi. Qoǵamdyq kólik úzdiksiz qatynaidy. Búgin kilti tapsyrylǵan jańa úilerdiń turǵyndary da sol jaǵalaýlyqtar qataryn tolyqtyrdy.
Saltanatty rásimde sóz sóilegen aimaq basshysy keiingi jyldardaǵy halyqtyń turmys sapasyn arttyrýǵa baǵyttalǵan aýqymdy jobalardy atap ótti.
«Memleket basshysy Qasym-Jomart Kemeluly «Qoljetimdi baspana – arman emes, bizdiń azamattarymyzdyń aldyndaǵy mindetimiz» degen bolatyn. Búgin turǵyn úi kezeginde turǵan jerlesterimizge jalpy aýmaǵy 33 myń sharshy metrden asatyn 600 páterdiń kiltin tabystap otyrmyz. Turǵyn úi kesheniniń aýmaǵynda eki fýtbol, tórt sport jáne oiyn alańy, tynyǵý aimaǵy, 250 oryndyq avtoturaq jáne úsh kommertsiialyq nysan ornalasqan. Aldaǵy ýaqytta da shahar kelbetine sán beretin zamanaýi turǵyn úiler boi kóteredi. Menshikti baspana – turaqtylyq pen erteńgi kúnge degen senimniń kepili. Jańa qonystaryńyz qutty bolsyn! Ár shańyraqqa baq-bereke, yrys pen yntymaq tileimin», – dedi Murat Ergeshbaev.
Oblys ákimi bul jobalardyń aimaqtaǵy qurylys salasynyń áleýetine, qurylysshylardyń kásibi deńgeiine oń yqpal etkenin jetkizdi.
Qyzylordadaǵy turǵyn úi qurylysynyń qarqynyn óńirdiń áleýmettik-ekonomikalyq damý kórsetkishterinen de, ai saiynǵy osyndai rásimder men qonystoilardan da baiqaýǵa bolady. Bul turǵyndardy baspanamen qamtý jumystarynyń bir júiege túskenin kórsetedi. Biyldyń ózinde turǵyn úi kezegindegi azamattarǵa 2400 páter tabystaý úshin biýdjetten 55 mlrd teńgeden astam qarjy qarastyrylǵan.
Jiynda Parlament Májilisiniń depýtaty Marhabat Jaiymbetuly sóz sóilep, el aǵasy Imamadin Zákiruly batasyn berdi. Turǵyn úidi sapaly etip salǵan qurylysshylar oblys ákiminiń Alǵys hatymen marapattaldy.
