Elordadaǵy «Barys Arena» sport kesheninde ótip jatqan Counter-Strike 2 boiynsha PGL Astana 2026 aýqymdy týrniri aiasynda «Zań men tártip» aktsiiasy uiymdastyryldy, dep habarlaidy dalanews.kz.
Álemniń úzdik kiberkomandalary baq synap jatqan týrnir barysynda elorda prokýratýrasynyń úilestirýimen Astana ákimdigi men qalalyq politsiia departamenti «Zań men tártip» qaǵidaty aiasynda profilaktikalyq is-sharalar ótkizdi.
Bastama jastar men elorda turǵyndarynyń quqyqtyq mádenietin, tsifrlyq saýattylyǵyn arttyrýǵa jáne jaýapty minez-qulyq qalyptastyrýǵa baǵyttalǵan.
Týrnir kórermenderi men jankúierlerine taqyryptyq aqparattyq broshiýralar taratyldy. Qonaqtarǵa zań men qoǵamdyq tártipti saqtaý, múlik pen qorshaǵan ortaǵa uqypty qaraýdyń mańyzdylyǵy eskertildi.
Sonymen qatar týrnir alańynda quqyqtyq tártip, jaýapkershilik jáne qoǵamdyq minez-qulyq mádenieti máselelerine arnalǵan aqparattyq stendter men plakattar qoiylǵan «Zań men tártip» taqyryptyq buryshtamasy uiymdastyryldy.
«Búginde jastardyń zamanaýi tehnologiialardy erkin meńgerip qana qoimai, tsifrlyq qaýipsizdik pen shynaiy ómirdegi zań talaptaryn da túsinýi asa mańyzdy. Mundai profilaktikalyq aktsiialar quqyqtyq mádenietti qalyptastyrýǵa, tsifrlyq saýattylyq deńgeiin arttyrýǵa jáne qoǵamdaǵy zańdylyq qaǵidattaryn nyǵaitýǵa yqpal etedi», – dedi Astana qalasy prokýrorynyń aǵa kómekshisi Aigerim Ómirzaqova.
Óz kezeginde kiberqylmysqa qarsy is-qimyl basqarmasy bastyǵynyń orynbasary Sáken Alaýhanov tsifrlyq tehnologiialardyń qarqyndy damýy men onlain qyzmetterdiń kóbeiýi qoǵamǵa jańa múmkindiktermen qatar kiberqaýipterdiń de artyp kele jatqanyn atap ótti. Onyń aitýynsha, sońǵy jyldary telefon jáne internet alaiaqtyǵy faktileri edáýir kóbeigen.
«Sonymen qatar halyq arasynda qarjylyq jáne quqyqtyq saýattylyq deńgeiiniń jetkiliksizdigi baiqalady. Bul azamattardy qylmystyq shemalarǵa tartylýyna áser etedi. Halyqty aqparattandyrý – quqyqbuzýshylyqtardyń aldyn alý men azamattardy alaiaqtyq áreketterden qorǵaýdyń negizgi tetikteriniń biri», – dep atap ótti ol.
Quqyq qorǵaý organdarynyń ókilderi mundai aktsiialardy sport alańdarynda ótkizý halyqtyń tsifrlyq qaýipsizdigin arttyrýǵa, ziiandy ádetterdiń aldyn alýǵa jáne zańdy saqtaý mádenietin nyǵaitýǵa yqpal etetinin aitty.
Eske salsaq, búgin elordadaǵy «Barys Arena» sport kesheninde Counter-Strike 2 boiynsha halyqaralyq PGL Astana 2026 týrniri bastaldy.
Chempionattyń jalpy júlde qory 1,6 million AQSh dollaryn quraidy. Astanaǵa Team Spirit, G2 Esports, FURIA Esports jáne Heroic syndy álemdik deńgeidegi 16 komanda jinaldy. Týrnir qazirdiń ózinde Qazaqstanda ótken eń iri kibersporttyq oqiǵalardyń biri retinde atalyp otyr.
