Májilis depýtaty Aıdos Sarym parlament qurylymyna qatysty suraqtarǵa jaýap berdi, dep habarlaıdy Dalanews.kz.

Depýtattyń aıtýynsha, Qazaqstannyń memlekettik qurylymy bir palataly nemese eki palataly parlamentke qaramastan, Prezıdenttik-Parlamenttik Respýblıka bolyp qala beredi.

"Prezıdent eshqaıda ketpeıdi. Bizde Prezıdenttik-Parlamenttik Respýblıka. Qurylym eki palataly ma, bir palataly ma – báribir, ol Prezıdenttik-Parlamenttik Respýblıka bolyp qala beredi", – dedi Sarym.

Aıdos Sarymnyń sózinshe, prezıdent atap ótken «kúshti prezıdent – yqpaldy parlament – esep beretin úkimet» trıadasy aldaǵy ózgeristermen tolyqqandy sıpat alady.

"Eger referendým bolyp, Konstıtýsıa ózgerse, onda belgili bir ókilettikter parlamentke berilýi múmkin", – dedi depýtat.

Sarym elimizde prezıdent ókilettigin berý tártibi naqty zań júzinde jazylmaǵanyn aıtty.

"Ártúrli jaǵdaı bolýy múmkin. Mysaly, Polshada búkil el basshylyǵy bir kúnde áýe apatynan qaza tapty. Mundaıda bılikti kim qabyldaıdy? Bul – úlken daǵdarysqa sebep bolýy múmkin. Sondyqtan algorıtmdi naqtylaý qajet. Prezıdent búgin ǵana bul máseleni kóterdi. Bir jyl ishinde talqylanady. Arnaıy organ nemese parlamenttik, konstıtýsıalyq komısıa qurylýy múmkin. Sonyń nátıjesinde sheshim qabyldaý tetigi jazylady", – dedi depýtat.

Onyń aıtýynsha, aldymen zańdardyń mátini daıyndalýy tıis. Referendýmnan keıin Parlament pen Prezıdent týraly zańdarǵa ózgerister engiziledi. Sodan keıin ǵana jańa júıe tolyqqandy sıpat alady.