ءماجىلىس دەپۋتاتى ايدوس سارىم پارلامەنت قۇرىلىمىنا قاتىستى سۇراقتارعا جاۋاپ بەردى، دەپ حابارلايدى Dalanews.kz.
دەپۋتاتتىڭ ايتۋىنشا، قازاقستاننىڭ مەملەكەتتىك قۇرىلىمى ءبىر پالاتالى نەمەسە ەكى پالاتالى پارلامەنتكە قاراماستان، پرەزيدەنتتىك-پارلامەنتتىك رەسپۋبليكا بولىپ قالا بەرەدى.
"پرەزيدەنت ەشقايدا كەتپەيدى. بىزدە پرەزيدەنتتىك-پارلامەنتتىك رەسپۋبليكا. قۇرىلىم ەكى پالاتالى ما، ءبىر پالاتالى ما – ءبارىبىر، ول پرەزيدەنتتىك-پارلامەنتتىك رەسپۋبليكا بولىپ قالا بەرەدى"، – دەدى سارىم.
ايدوس سارىمنىڭ سوزىنشە، پرەزيدەنت اتاپ وتكەن «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» ترياداسى الداعى وزگەرىستەرمەن تولىققاندى سيپات الادى.
"ەگەر رەفەرەندۋم بولىپ، كونستيتۋسيا وزگەرسە، وندا بەلگىلى ءبىر وكىلەتتىكتەر پارلامەنتكە بەرىلۋى مۇمكىن"، – دەدى دەپۋتات.
سارىم ەلىمىزدە پرەزيدەنت وكىلەتتىگىن بەرۋ ءتارتىبى ناقتى زاڭ جۇزىندە جازىلماعانىن ايتتى.
"ءارتۇرلى جاعداي بولۋى مۇمكىن. مىسالى، پولشادا بۇكىل ەل باسشىلىعى ءبىر كۇندە اۋە اپاتىنان قازا تاپتى. مۇندايدا بيلىكتى كىم قابىلدايدى؟ بۇل – ۇلكەن داعدارىسقا سەبەپ بولۋى مۇمكىن. سوندىقتان الگوريتمدى ناقتىلاۋ قاجەت. پرەزيدەنت بۇگىن عانا بۇل ماسەلەنى كوتەردى. ءبىر جىل ىشىندە تالقىلانادى. ارنايى ورگان نەمەسە پارلامەنتتىك، كونستيتۋسيالىق كوميسسيا قۇرىلۋى مۇمكىن. سونىڭ ناتيجەسىندە شەشىم قابىلداۋ تەتىگى جازىلادى"، – دەدى دەپۋتات.
ونىڭ ايتۋىنشا، الدىمەن زاڭداردىڭ ءماتىنى دايىندالۋى ءتيىس. رەفەرەندۋمنان كەيىن پارلامەنت پەن پرەزيدەنت تۋرالى زاڭدارعا وزگەرىستەر ەنگىزىلەدى. سودان كەيىن عانا جاڭا جۇيە تولىققاندى سيپات الادى.
