Bas prokýratýra janyndaǵy Zańsyz shyǵarylǵan aktivterdi qaitarý komitetiniń ataýy ózgeredi. Bul týraly Prezident Qasym-Jomart Toqaev halyqqa Joldaýynda málimdedi, dep habarlaidy Dalanews.kz.
"Meniń oiymsha, endi Komitettiń ataýyn ózgertip, ony Investorlardyń quqyqtaryn qorǵaý komiteti dep ataý qajet. Aita ketý kerek, Bas prokýratýra zańsyz aktiv ielerimen tiimdi jumys júrgizdi. Qazynaǵa shamamen 150 mlrd teńge qaitaryldy", – dedi Memleket basshysy.
Onyń aitýynsha, bul qarjynyń esebinen 10 mektep pen 4 sport nysany salyndy, densaýlyq saqtaý nysandarynyń qurylysy men jańǵyrtylýy júrgizildi, sondai-aq 177 sý infraqurylymy nysany paidalanýǵa berildi.
Eske sala ketsek, Zańsyz aktivterdi qaitarý komiteti 2023 jylǵy 5 qazanda qurylǵan bolatyn. Onyń mindetine aktivterdi izdeý jáne qaitarý, osy saladaǵy halyqaralyq-quqyqtyq yntymaqtastyqty damytý, sondai-aq ekonomikalyq resýrstardyń zańsyz shoǵyrlanýyna jáne aktivterdiń elden zańsyz shyǵarylýyna yqpal etetin sebepter men jaǵdailardy anyqtaý jáne joiý kirdi.
