Memleket basshysy Qasym-Jomart Toqaev Qazaqstan halqyna Joldaýynda áleýmettik saiasattaǵy basym baǵyttarǵa toqtaldy. Prezidenttiń aitýynsha, aimaqtardaǵy áleýmettik turǵydan osal toptaǵy azamattarǵa tólenetin tólemderdi birizdendirý qajet, dep habarlaidy Dalanews.kz.
«Memlekettiń kóz aldyndaǵydan basqany kórmei, bárine kóne beretin áleýmettik saiasaty júzden astam túrli jeńildiktiń paida bolýyna ákep soqtyrdy. Osy jeńildikterdi áperemin dep «kómek qolyn» sozatyn jylpostar da kóbeidi», – dedi Prezident.
Onyń aitýynsha, memleket negizgi mindetterinen bas tartpaidy, biraq áleýmettik jeńildikterdi qoldan kóbeitý – eldiń damýyna jumsalýy tiis qyrýar qarajatty bosqa shashýmen teń.
«Áleýmettik salada ońtaily sheshim qabyldaýdyń ornyna, Úkimet keminde 15 jyl boiy áleýmettik masyldyq pen áleýmettik alaiaqtyqqa jol berip keldi», – dedi Memleket basshysy.
Prezident demografiialyq úrdisterdi tereń zerttep, uzaq merzimdi sheshimder qabyldaý qajettigin de atap ótti. Osy maqsatta Strategiialyq josparlaý jáne reformalar agenttiginiń bazasynda jasandy intellekt tehnologiialary qoldanylatyn Demografiialyq úderisterdi taldaý jáne boljaý ortalyǵyn qurýdy tapsyrdy.
Sonymen qatar Qasym-Jomart Toqaev zeinetaqy júiesin qaita qaraý qajettigin aitty.
«Azamattardyń, ásirese, óz-ózin jumyspen qamtyp otyrǵan adamdardyń zeinetaqy jinaǵy az ekeni baiqalady. Úkimet Ulttyq bankpen birlese otyryp, zeinetaqy júiesiniń qarjylyq turaqtylyǵyn nyǵaitý sharalaryn oilastyrýy kerek», – dedi ol.
Prezident halyqtyń qarjylyq saýattylyǵyn arttyrý máselesine de toqtaldy. Onyń aitýynsha, «AMANAT» partiiasynyń «Qaryzsyz qoǵam» jobasy bul baǵyttaǵy mańyzdy bastama bolyp otyr. Ótken jyly joba aiasynda 845 myń azamat bilimin jetildirip, zańgerlik keńes alǵan.
«Túpki maqsat – halyqtyń moinyndaǵy qaryzyn azaitý ǵana emes, azamattardyń tabysy turaqty bolýyn qamtamasyz etý», – dep túiindedi Memleket basshysy.
