Batys Qazaqstan oblysynda Memleket basshysynyń bastamasymen júzege asyp jatqan «Taza Qazaqstan» respýblikalyq baǵdarlamasy aiasynda «50 jańa aýla» ekologiialyq aktsiiasy jalǵasýda. Kezekti is-shara Oral qalasynda uiymdastyrylyp, turǵyndardyń ómir súrý sapasyn jaqsartýǵa jáne qorshaǵan ortanyń tazalyǵyn saqtaýǵa baǵyttaldy, dep habarlaidy dalanews.kz.
Aktsiia barysynda kópqabatty turǵyn úilerdiń aýlalarynda abattandyrý jumystary júrgizildi. Aýla aýmaqtary qoqystan tazartylyp, jasyl jelekter retke keltirildi.
Ekologiialyq bastamaǵa oblys jastary men eriktiler qatysyp, ortaq iske óz úlesterin qosty. Qatysýshylar senbilik ótkizip, aýlalardy retke keltirý jumystaryna jumyla atsalysty.
Mamandardyń aitýynsha, mundai sharalar qalanyń sanitarlyq jaǵdaiyn jaqsartyp qana qoimai, turǵyndardyń ekologiialyq mádenietin arttyrýǵa jáne qorshaǵan ortaǵa degen jaýapkershiligin kúsheitýge múmkindik beredi.
Batys Qazaqstan oblystyq jastarmen jumys jónindegi resýrstyq ortalyǵy basshysynyń orynbasary Nursultan Sársenbaevtyń aitýynsha, aktsiianyń basty ereksheligi – turǵyndardy óz aýlasynyń tazalyǵy men kórkeiýine belsendi atsalysýǵa yntalandyrý.
– «Taza Qazaqstan» bastamasy – qorshaǵan ortany taza ustaýǵa baǵyttalǵan bir rettik aktsiia emes, bul qoǵamda ekologiialyq jaýapkershilik mádenietin qalyptastyratyn mańyzdy joba. «50 jańa aýla» aktsiiasy arqyly jastar men turǵyndar ortaq iske birigip, týǵan qalasynyń damýyna naqty úles qosyp keledi. Osyndai bastamalar óńirdegi ekologiialyq mádenietti nyǵaityp, halyqtyń ómir súrý sapasyn arttyrýǵa yqpal etedi, – dedi Nursultan Sársenbaev.
Uiymdastyrýshylardyń málimetinshe, «50 jańa aýla» aktsiiasy aldaǵy ýaqytta da jalǵasady. Joba aiasynda óńirdiń ártúrli aýmaqtarynda tazalyq jáne abattandyrý jumystary uiymdastyrylyp, turǵyndardy qorshaǵan ortany qorǵaýǵa jáne týǵan ólkesiniń kórkeiýine úles qosýǵa shaqyrý jumystary júrgiziledi.
