مەملەكەت باسشىسى قاسىم-جومارت توقايەۆ قازاقستان حالقىنا جولداۋىندا الەۋمەتتىك ساياساتتاعى باسىم باعىتتارعا توقتالدى. پرەزيدەنتتىڭ ايتۋىنشا، ايماقتارداعى الەۋمەتتىك تۇرعىدان وسال توپتاعى ازاماتتارعا تولەنەتىن تولەمدەردى بىرىزدەندىرۋ قاجەت، دەپ حابارلايدى Dalanews.kz. 

«مەملەكەتتىڭ كوز الدىنداعىدان باسقانى كورمەي، بارىنە كونە بەرەتىن الەۋمەتتىك ساياساتى جۇزدەن استام ءتۇرلى جەڭىلدىكتىڭ پايدا بولۋىنا اكەپ سوقتىردى. وسى جەڭىلدىكتەردى اپەرەمىن دەپ «كومەك قولىن» سوزاتىن جىلپوستار دا كوبەيدى»، – دەدى پرەزيدەنت.

ونىڭ ايتۋىنشا، مەملەكەت نەگىزگى مىندەتتەرىنەن باس تارتپايدى، ءبىراق الەۋمەتتىك جەڭىلدىكتەردى قولدان كوبەيتۋ – ەلدىڭ دامۋىنا جۇمسالۋى ءتيىس قىرۋار قاراجاتتى بوسقا شاشۋمەن تەڭ.

«الەۋمەتتىك سالادا وڭتايلى شەشىم قابىلداۋدىڭ ورنىنا، ۇكىمەت كەمىندە 15 جىل بويى الەۋمەتتىك ماسىلدىق پەن الەۋمەتتىك الاياقتىققا جول بەرىپ كەلدى»، – دەدى مەملەكەت باسشىسى.

پرەزيدەنت دەموگرافيالىق ۇردىستەردى تەرەڭ زەرتتەپ، ۇزاق مەرزىمدى شەشىمدەر قابىلداۋ قاجەتتىگىن دە اتاپ ءوتتى. وسى ماقساتتا ستراتەگيالىق جوسپارلاۋ جانە رەفورمالار اگەنتتىگىنىڭ بازاسىندا جاساندى ينتەللەكت تەحنولوگيالارى قولدانىلاتىن دەموگرافيالىق ۇدەرىستەردى تالداۋ جانە بولجاۋ ورتالىعىن قۇرۋدى تاپسىردى.

سونىمەن قاتار قاسىم-جومارت توقايەۆ زەينەتاقى جۇيەسىن قايتا قاراۋ قاجەتتىگىن ايتتى.

«ازاماتتاردىڭ، اسىرەسە، ءوز-وزىن جۇمىسپەن قامتىپ وتىرعان ادامداردىڭ زەينەتاقى جيناعى از ەكەنى بايقالادى. ۇكىمەت ۇلتتىق بانكپەن بىرلەسە وتىرىپ، زەينەتاقى جۇيەسىنىڭ قارجىلىق تۇراقتىلىعىن نىعايتۋ شارالارىن ويلاستىرۋى كەرەك»، – دەدى ول.

پرەزيدەنت حالىقتىڭ قارجىلىق ساۋاتتىلىعىن ارتتىرۋ ماسەلەسىنە دە توقتالدى. ونىڭ ايتۋىنشا، «AMANAT» پارتياسىنىڭ «قارىزسىز قوعام» جوباسى بۇل باعىتتاعى ماڭىزدى باستاما بولىپ وتىر. وتكەن جىلى جوبا اياسىندا 845 مىڭ ازامات ءبىلىمىن جەتىلدىرىپ، زاڭگەرلىك كەڭەس العان.

«تۇپكى ماقسات – حالىقتىڭ موينىنداعى قارىزىن ازايتۋ عانا ەمەس، ازاماتتاردىڭ تابىسى تۇراقتى بولۋىن قامتاماسىز ەتۋ»، – دەپ تۇيىندەدى مەملەكەت باسشىسى.