Prezident Qasym-Jomart Toqaev Qazaqstan halqyna joldaýynda salyqtan túsken ár teńge halyqtyń igiligine jumsalýǵa tiis ekenin málimdedi, dep habarlaidy Dalanews.kz.
"Biz azamattarǵa kórsetiletin memlekettik qyzmetterdi tsifrlandyrý isinde zor jetistikke jettik. Biraq biýrokratiialyq rásimder áli kúnge deiin bizneske kedergi bolyp otyr. Tsifrlandyrý isiniń maqsaty áli oryndalǵan joq. Bul ahýaldy shuǵyl túzeý kerek. Eń aldymen, salyqtyq ákimshilendirýge nazar aýdarý qajet. Memlekettik kirister komiteti tsifrlandyrý úderisi boiynsha memlekettik organdar arasynda kósh bastaýǵa tiis. Bul mekeme jasandy intellektiniń jáne basqa da ozyq tehnologiianyń áleýetin salyq tóleýshilerdiń múddesine sai tiimdi qoldanýy kerek. Osy júieli qadamnyń bári memleket pen biznestiń arasyndaǵy qarym-qatynastyń múldem jańa, servistik úlgisin jasaýǵa arnalǵan", - dedi Prezident.
Memleket basshysynyń pikirinshe, jańa Salyq kodeksi qazirgi normalar men rásimderdi ózgertýmen shektelmeýi kerek.
"Bul qujat salyq tóleýshilerdiń ashyqtyq pen adaldyqqa negizdelgen jańa tanym-túsinigi men bolmysyn qalyptastyrýǵa tiis. Memleket adal jumys isteitin salyq tóleýshilerdiń múddesin qorǵaidy. Olardyń adal eńbeginen túsken salyqty elimizdi damytýǵa jumsaidy.
Salyqtan túsken ár teńge halyqtyń igiligine jumsalýǵa tiis. Bul – azamattarǵa sapaly memlekettik qyzmet kórsetilip, infraqurylym salynyp, memlekettik qoldaý sharalary usynylýy qajet degen sóz.
Damý institýttary kásipkerlerdiń belsendiligin arttyrý isinde airyqsha ról atqarýǵa tiis. Biraq olardyń jumysynda biraz kemshilik bar. Damý institýttarynyń qyzmetin ózgertetin kez keldi. Shyn máninde, bul qurylymdar naqty bir salaǵa baǵyttalǵan, tereń taldaý jasaýǵa qabiletti jáne investitsiia salýǵa quqyly tolyqqandy damý institýty retinde jumys isteýge tiis", - dedi Toqaev.
