پرەزيدەنت قاسىم-جومارت توقايەۆ قازاقستان حالقىنا جولداۋىندا سالىقتان تۇسكەن ءار تەڭگە حالىقتىڭ يگىلىگىنە جۇمسالۋعا ءتيىس ەكەنىن مالىمدەدى، دەپ حابارلايدى Dalanews.kz.
"ءبىز ازاماتتارعا كورسەتىلەتىن مەملەكەتتىك قىزمەتتەردى سيفرلاندىرۋ ىسىندە زور جەتىستىككە جەتتىك. ءبىراق بيۋروكراتيالىق راسىمدەر ءالى كۇنگە دەيىن بيزنەسكە كەدەرگى بولىپ وتىر. سيفرلاندىرۋ ءىسىنىڭ ماقساتى ءالى ورىندالعان جوق. بۇل احۋالدى شۇعىل تۇزەۋ كەرەك. ەڭ الدىمەن، سالىقتىق اكىمشىلەندىرۋگە نازار اۋدارۋ قاجەت. مەملەكەتتىك كىرىستەر كوميتەتى سيفرلاندىرۋ ۇدەرىسى بويىنشا مەملەكەتتىك ورگاندار اراسىندا كوش باستاۋعا ءتيىس. بۇل مەكەمە جاساندى ينتەللەكتىنىڭ جانە باسقا دا وزىق تەحنولوگيانىڭ الەۋەتىن سالىق تولەۋشىلەردىڭ مۇددەسىنە ساي ءتيىمدى قولدانۋى كەرەك. وسى جۇيەلى قادامنىڭ ءبارى مەملەكەت پەن بيزنەستىڭ اراسىنداعى قارىم-قاتىناستىڭ مۇلدەم جاڭا، سەرۆيستىك ۇلگىسىن جاساۋعا ارنالعان"، - دەدى پرەزيدەنت.
مەملەكەت باسشىسىنىڭ پىكىرىنشە، جاڭا سالىق كودەكسى قازىرگى نورمالار مەن راسىمدەردى وزگەرتۋمەن شەكتەلمەۋى كەرەك.
"بۇل قۇجات سالىق تولەۋشىلەردىڭ اشىقتىق پەن ادالدىققا نەگىزدەلگەن جاڭا تانىم-تۇسىنىگى مەن بولمىسىن قالىپتاستىرۋعا ءتيىس. مەملەكەت ادال جۇمىس ىستەيتىن سالىق تولەۋشىلەردىڭ مۇددەسىن قورعايدى. ولاردىڭ ادال ەڭبەگىنەن تۇسكەن سالىقتى ەلىمىزدى دامىتۋعا جۇمسايدى.
سالىقتان تۇسكەن ءار تەڭگە حالىقتىڭ يگىلىگىنە جۇمسالۋعا ءتيىس. بۇل – ازاماتتارعا ساپالى مەملەكەتتىك قىزمەت كورسەتىلىپ، ينفراقۇرىلىم سالىنىپ، مەملەكەتتىك قولداۋ شارالارى ۇسىنىلۋى قاجەت دەگەن ءسوز.
دامۋ ينستيتۋتتارى كاسىپكەرلەردىڭ بەلسەندىلىگىن ارتتىرۋ ىسىندە ايرىقشا ءرول اتقارۋعا ءتيىس. ءبىراق ولاردىڭ جۇمىسىندا ءبىراز كەمشىلىك بار. دامۋ ينستيتۋتتارىنىڭ قىزمەتىن وزگەرتەتىن كەز كەلدى. شىن مانىندە، بۇل قۇرىلىمدار ناقتى ءبىر سالاعا باعىتتالعان، تەرەڭ تالداۋ جاساۋعا قابىلەتتى جانە ينۆەستيسيا سالۋعا قۇقىلى تولىققاندى دامۋ ينستيتۋتى رەتىندە جۇمىس ىستەۋگە ءتيىس"، - دەدى توقايەۆ.
