Memleket basshysy birpalataly parlamentti partiia tizimimen sailaýdy usyndy, dep habarlaidy Dalanews.kz.
"Men Senatqa on jyl basshylyq ettim. Bul jumysty qashanda zor mártebe ári úlken jaýapkershilik dep sanadym. Sondyqtan maǵan osy minberden parlamenttik reforma týraly aitý ońai emes. Soǵan qaramastan men dál búgin elimizde kóp uzamai bir palataly Parlament qurý týraly bastama kótergim keledi. Birden aitaiyn, bul – óte mańyzdy másele. Ony asyǵys júzege asyrýǵa bolmaidy. Bul reforma azamattyq sektorda, sarapshylar ortasynda, sondai-aq, árine, qazirgi Parlamentte jan-jaqty talqylanýy qajet. Reformanyń mán-mańyzy airyqsha ekenin eskersek, ony talqylaýǵa bir jyl ýaqyt kerek dep oilaimyn", - deidi prezident.
Sodan keiin, iaǵni, 2027 jyly jalpyulttyq referendým ótkizýge bolar edi. Sodan soń Konstitýtsiiaǵa tiisti ózgeris engize alamyz deidi prezident.
"Men memlekettiń taǵdyryn aiqyndaityn barlyq másele halyqtyń kelisimimen ǵana sheshiledi dep buǵan deiin birneshe ret aittym. Eger bir palataly Parlament qurý qajet degen ortaq sheshimge kelsek, ondai Parlamentti tek qana partiialyq tizim boiynsha sailaǵan jón dep sanaimyn.
Bul – álemde keńinen taraǵan parlamenttik rásim. Osylaisha, Májilistiń qazirgi quramy barlyq zańdyq rásimder aiaqtalǵansha óz isimen ainalysa beredi. Senat jalpyulttyq referendýmnyń qorytyndysy shyǵyp, jańa Parlament sailaýy ótkenge deiin alańsyz jumys isteidi. Al saiasi partiialardyń básekeli tartysqa daiyndalýyna ýaqyty bolady. Depýtattarymyz naǵyz memleketshil azamat retinde bul máselege zor jaýapkershilikpen ári túsinistikpen qaraidy dep oilaimyn. Túptep kelgende, saiasi reformalardyń bári elimizdiń birtutas institýtsionaldy júiesiniń ajyramas bóligine ainalady", - deidi memleket basshysy.
Árine, zańdy suraq týyndaýy múmkin: Prezident Parlamenttik reforma jasaý qajettigi týraly nege sonshalyqty erte jariialap jatyr, áitpese, saiasi tehnologiianyń qaǵidasyna sáikes mundai sharalar tosynnan, kútpegen jerden jasalady emes pe?
"Biraq men osyǵan deiin de aittym, taǵy da qaitalap aitamyn: men elimizdiń jáne halqymyzdyń taǵdyryna qatysty qandai da bir máselege kelgende tek qana ashyq saiasat júrgizý kerek dep sanaimyn, mundai aýqymdy reformany qoǵamnan qupiia ustaýǵa bolmaidy dep esepteimin. Osyndai taǵdyrly máseleler boiynsha halyqpen ashyq suhbat júrgizý qajet dep senemin. Sonda ǵana bárimiz bir el bolyp, Ádiletti jáne Qýatty Qazaqstandy qurý jolynda taǵy bir mańyzdy qadam jasaimyz", - deidi prezident.
