Memleket basshysy Qasym-Jomart Toqaev Qazaqstan halqyna Joldaýynda jer qatynastaryna qatysty túitkilderdi sheshý jóninde birqatar naqty tapsyrma berdi. Prezidenttiń aitýynsha, aýyl sharýashylyǵy jerleriniń bar igiligi eldiń damýyna jáne halyqtyń turmysyn jaqsartýǵa jumsalýy kerek, dep habarlaidy Dalanews.kz.
«Men igerilmei bos jatqan jáne zańsyz alynǵan aýyl sharýashylyǵy jerlerin keri qaitaryp, ony qaita bólý týraly tapsyrma berdim. Jer iesiz qalmaýǵa tiis, jerdi tek qana onyń qadirin biletin azamattarǵa berý kerek», – dedi Toqaev.
Onyń dereginshe, 2022 jyldan beri jalpy aýmaǵy 13,5 million gektardan astam jer memleket menshigine qaitarylǵan. Alaida ákimdikter sonyń tek 6 million gektaryn ǵana jańa jer igerýshilerge bólip úlgergen.
«Iesin tapqan jer óndiristiń oshaǵyna, investitsiia kózine, qainaǵan eńbektiń ortasyna ainalýy qajet. Bul – anyq nárse», – dep atap ótti Prezident.
Osyǵan bailanysty óńir ákimderine qaitarylǵan jerdiń bárin kelesi jyldyń ortasyna deiin turaqty ainalymǵa engizý tapsyryldy. Bul shara jaiylym tapshylyǵyn sheshýge de múmkindik beredi.
Sonymen qatar Memleket basshysy jer qatynastaryna qatysty zańsyzdyq pen qaǵazbastylyqty joiýdyń mańyzdylyǵyna toqtaldy.
«Aýyl sharýashylyǵy jerlerin bólý tásilderin túbegeili ózgertý kerek. Jerdi bólýge qatysty sheshim tsifrlyq formatta, elektrondy konkýrstar arqyly qabyldanýǵa tiis. Úkimet jyl sońyna deiin zańnamaǵa tiisti ózgertýler usynýy qajet», – dedi ol.
Prezident bul salada tsifrlyq tehnologiialardy keńinen qoldaný qajettigin de erekshe atap ótti. Búginde kosmomonitoring pen geotaldaý júiesi paidalanylmai jatqan jerlerdi anyqtaýǵa septigin tigizýde. Endi jasandy intellekt arqyly jerdiń sapasyna, eginniń shyǵymyna jáne daqyldardyń jai-kúiine tereń taldaý jasalatyn bolady.
Memleket basshysy bul tásil orman sharýashylyǵyna da qatysty ekenin eske saldy. Máselen, Soltústik Qazaqstan oblysynda 9 myń gektar ormannyń iesiz jatqany anyqtalǵan.
Sondai-aq Prezident biryńǵai tsifrlyq jer kartasyn ázirleýdi tapsyrdy. Bul júiege kadastrlyq málimettermen birge infraqurylym jáne jer qoinaýyn paidalanýǵa qatysty aqparat ta engizilmek.
