Astanadaǵy atyshýly Gastroortalyqta ornalasqan ZIMA túngi klýby tóńireginde daý týyndady. Advokat Erlan Ǵazymjanov mekeme ieleriniń kelisiminsiz jumysyn jalǵastyryp jatqan klýbty "óz betimen áreket etti" dep aiyptasa, politsiia qoǵamdyq tártipti baqylaýda ustap otyrǵanyn málimdedi, dep habarlaidy Dalanews.kz.
Astanadaǵy ZIMA túngi klýby men Gastroortalyq ieleri arasyndaǵy daýly jaǵdaiǵa politsiia departamenti túsinikteme berdi. Másele týraly advokat Erlan Ǵazymjanov málimdedi.
ZIMA klýby Bishimbaevtyń qylmystyq isine bailanysty atyshýly bolǵan ǵimaratta ornalasqan. Bul ǵimarat eks-ministr Qýandyq Bishimbaevtyń anasyna tiesili. Dál osy jerde burynǵy sheneýnik óziniń azamattyq jubaiy Saltanat Núkenovany óltirgen edi.
Advokattyń sózinshe, klýb arendatordyń kelisiminsiz ári jaldaý sharty buzylǵanyna qaramastan jumysyn jalǵastyryp jatyr.
“2024 jyldyń qańtarynda “ZIMA ASTANA” JShS Gastroortalyqtaǵy ǵimaratty jalǵa alyp, onda oiyn-saýyq jáne qoǵamdyq tamaqtaný qyzmetin uiymdastyrýǵa kelisim jasaǵan. Alaida klýb ashylǵannan keiin turǵyndar birneshe ret áleýmettik jelilerde shaǵym qaldyrdy: mýzyka tańǵy 5–6-ǵa deiin toqtamaidy, kúzetshiler men kelýshiler arasynda qaqtyǵystar oryn alǵan. Sonymen birge kalian men azot totyǵynyń taratylatyny týraly da aqparat tústi”, – dedi Erlan Ǵazymjanov.
Onyń aitýynsha, jalǵa berýshiler sharttyń buzylǵanyn aityp, kelisimdi merziminen buryn toqtatqan. Soǵan qaramastan, klýb qyzmetkerleri esiktiń qulpyn buzyp kirip, elektr jáne bailanys júielerine qaita qosylyp, qyzmetin jalǵastyrǵan. Barmender tipti elektr qýatyn qaita qosýdy talap etip, miting uiymdastyrǵan. Al politsiia olardy jaýapqa tartpaǵan.
“Ieleriniń quqyq qorǵaý organdaryna bergen aryzdary – óz betimen áreket etý men tyiym salynǵan zattardy taratý faktileri boiynsha – jaýapsyz qalyp otyr. Tipti elektr qalqanyn qorǵaýǵa taǵaiyndalǵan kúzetshi qyzmetin atqarmai, “qalanyń jumysyn qamtamasyz etý kerek” dep túsindirgen”, – dedi advokat.
Al Astana qalalyq politsiia departamenti Informburo saýalyna bergen jaýabynda:
jaldaý shartysyz nemese iesiniń kelisiminsiz qyzmet etý máseleleri memlekettik kirister organdarynyń quzyretine jatatynyn aitty.
“Quqyq qorǵaý organdary ZIMA túngi klýbyndaǵy qoǵamdyq tártipti turaqty túrde baqylaýda ustaidy. Jyl basynan beri 102 nómirine klýb jumysyna qatysty shaǵymdar tústi. Olardyń ishinde tynyshtyqty buzý, dene jaraqatyn salý, múlikti urlaý, usaq buzaqylyq, tyiym salynǵan jerde shylym shegý jáne basqa da quqyqbuzýshylyqtar bar. Tekserý nátijesinde kináliler ákimshilik jaýapkershilikke tartyldy”, – delingen resmi habarlamada.
Sonymen qatar klýb ákimshiligine quqyqbuzýshylyqtarǵa jol bergen sebepter men jaǵdailardy joiý jóninde birneshe uiǵarym engizilgen.
Esil aýdandyq politsiia qyzmetkerleriniń is-áreketteriniń zańdylyǵy da tekserilip, olardyń tarapynan tártiptik teris qylyq belgileri anyqtalmaǵan.
Politsiia departamentiniń málimetinshe, demalys jáne mereke kúnderi túngi klýbqa qoǵamdyq tártipti kúzetý úshin jeke nariadtar bólinedi. Qaýipsizdik pen zań talaptarynyń saqtalýyn qamtamasyz etý sharalary turaqty júrgizilýde.
