"Za rýlem Kazahstan" jýrnalynyń redaktory, jýrnalıs Alekseı Alekseev qaraǵandylyq Alıka Muhamadıeva esimdi qyzǵa qatysty jazba jarıalap, onyń áreketin qatań synǵa aldy. Eske sala keteıik, Alıka áleýmettik jelidegi jazbasynda qazaq halqyn qorlap, "mambetter" degen sózdi qoldanǵany úshin qoǵamnyń ashýyna tıgen bolatyn, dep habarlaıdy Dalanews.kz.
Qaraǵandydan shyqqan 22 jastaǵy Alıka esimdi boıjetkenniń qylyǵy jurttyń ashýyn týǵyzdy. Ózi krıptovalúta arqyly aqsha tabýdy úıretedi eken. Demek, aqyly az emes. Biraq aqyldyń kóptigi ádebiniń kemdigin jasyra almady.
Onyń aıtqan beıpil sóziniń birin bala kezde Óskemende estigenmin. Ol kezde sondaı sóz aýzynan shyqqandy kórse, úlkender teris aınalatyn. Al ekinshi dóreki sózdi de estıtin kez bar. Biraq óz ortam ondaı sózden ada.
Sonda oıǵa túıgenim mynaý: Alıka muny otbasynan boıyna sińirip ósken. Áıtpese búkil halyqty «mambet» dep qorlap, mensinbeýi múmkin emes. Qazaqtyń jerinde turyp, aýasyn jutyp, dámin tatyp otyryp, halyqqa bıikten qaraý – naǵyz teksizdik.
Onyń aýzynan shyqqan sóz – búkil elge jabylǵan kúıe. Iaǵnı, meniń de ar-namysyma tıgen is. Sebebi men osy eldiń azamatymyn. Halqymdy qadirleımin, elimdi súıemin. Demek, Alıkanyń aıtqany meniń de namysyma tıedi.
Bul jaǵdaı qoǵamda áli de osyndaı oıdaǵy adamdardyń bar ekenin kórsetip otyr. Biraq menińshe, bulardyń kóbi áldeqashan kóship ketken ne ketýge qamdanýda. Sebebi óz elin jek kórip, sol eldiń ortasynda ómir súrý – ózin-ózi qınaý. Ne turǵan jerińdi qurmette, ne qadir tutatyn jerińe kóship ket. Árıne, syrtqa ketkenniń bári osy topqa kirmeıdi. Bireý jańa orta izdep, endi bireý múmkindiktiń sońynan ketedi.
Al endi jurtty kemsitken Alıkaǵa qandaı jaza laıyq degen suraq tur.
Halyqtyń narazylyǵy – osyndaı astamshylyqqa berilgen jaýap. Onyń menmendigi, halyqty qorlaýy – ótken zamannyń sarqynshaǵy.
Qyzdy elden shyǵarýǵa da, azamattyǵynan aıyrýǵa da bolar. Bostandyqqa shyqqan soń, bálkim, ózi de keter. Biraq bir nárse anyq: qaıda barsa da, ózimen birge osy minezin ala ketedi. Eger boıyndaǵy minin túzeýge asyqpasa, ol barǵan jerinde de jurtty mensinbeıtin qalpynda qalady.
Bul oqıǵadan árkim óz sabaǵyn aldy. Óz basym ortamyzdan osyndaı adam shyqqany úshin qysylamyn. Qaraǵandynyń jurty da uıalǵan shyǵar. Óıtkeni sol qalada eńbegi adal, nıeti taza, tárbıesi túzý jurt az emes.
Qyzdyń jazasyn sot shesher. Al onyń aldynda qıyn jol tur. Eger osy oqıǵadan sabaq alyp, ishki jan dúnıesin túbegeıli ózgertpese, kelbetiniń sulýlyǵy ishindegi shirigen minezin báribir jasyra almaıdy
