Shemonaıha aýdanynda sý qubyry jelilerin salý boıynsha aýqymdy joba júzege asyrylýda. Jobalaý-smetalyq qujattama 2023 jyly «ALPHA GRAPHICS» JSHS tarapynan ázirlenip, jobanyń jalpy quny 552,4 mln teńgeni qurady.

Jobada uzyndyǵy 17,1 shaqyrym bolatyn sý qubyry jelilerin tartý, jańa (rezervtik) sý alatyn uńǵyma burǵylaý, eki birinshi kótergish jáne bir ekinshi kótergish sorǵy stansıasy bar sý tartý alańyn salý, sondaı-aq árqaısysynyń syıymdylyǵy 75 m³ bolatyn eki taza sý rezervýaryn turǵyzý kózdelgen.

2024 jyldyń basynan bastap joba iske asyrý kezeńine ótti. Bas merdiger – «Sem ARTA Stroy» JSHS. Ótken jyly oblystyq búdjetten 71 mln teńge bólinip, tolyq ıgerildi. 2025 jyly jobaǵa tolyq qarjylandyrý qarastyryldy: respýblıkalyq búdjetten 200 mln teńge jáne Arnaıy memlekettik qordan 242,2 mln teńge bólindi.

Qazirgi ýaqytta jobada qarastyrylǵan 17,1 shaqyrymnyń 12 shaqyrymy tóselip, 86 qudyqtyń 46-sy ornatyldy. Sý alý uńǵymasyn burǵylaý jumystary aıaqtalýǵa jaqyn, al sorǵy stansıalarynda jer qazý jáne irgetas quıý jumystary bastaldy.

Qurylys alańynda 26 jumysshy men 6 arnaıy tehnıka (samosvaldar, ekskavatorlar, manıpýlátorlar jáne tıegish) jumyldyrylǵan. Qurylys-montaj jumystarynyń oryndalý deńgeıi – 40%. Jobany aıaqtaý 2025 jyldyń qazan aıyna josparlanǵan.

Atalǵan jobanyń iske asyrylýy Úlken ózen aýylyndaǵy 355 turǵyndy sapaly aýyz sýmen qamtamasyz etýge múmkindik beredi jáne Qazaqstan Respýblıkasy Prezıdentiniń el halqyn 100% taza aýyz sýmen qamtý jónindegi tapsyrmasyn oryndaýǵa baǵyttalǵan mańyzdy qadam bolyp tabylady.