Volonter bolý nemese belsendi jastardyń qataryna qosylý — bul ózgege kómektesip qana qoimai, ózińizdi de damytý joly. Ony neden bastaý kerek? Qandai múmkindikter bar? Osy jáne basqa da mańyzdy suraqtarǵa jaýap izdep kóreiik.
Volonterlik ne beredi?
Kópshiliktiń oiynsha, volonter eshqandai aqy almaityn adam. Bul ras. Biraq bul — ol eshteńe almaidy degen sóz emes. Volonterlerdiń aitýynsha, eń úlken syi — bireýge paida ákelgenin seziný.
Sonymen qatar, volonterlik:
- Qoǵamdyq ortada tájiribe jinaýǵa kómektesedi;
- Reziýme úshin paidaly;
- Bailanys ornatýǵa, jańa adamdarmen tanysýǵa jol ashady;
- Keibir ýniversitetterde qosymsha ball beredi nemese tájiribe retinde esepteledi;
- Álemdi kórýge múmkindik beredi — halyqaralyq jobalarǵa qatysýǵa jol ashyq.
Bul jumys — ýaqyt pen kúsh talap etedi. Keide eriktiler qiyn jaǵdaiǵa túsken adamdarmen jumys isteidi, uiymdastyrýǵa qatysady, fizikalyq kúsh salady. Erikti de keide sharshaidy, kúizeliske túsedi, sondyqtan bastysy — óz múmkindigińizdi baǵalap, «Nelikten men volonter bolǵym keledi?» degen suraqqa shynaiy jaýap berý.
Qandai baǵyttar bar?
Volonterlik óte keń sala. Qazaqstanda tómendegidei baǵyttar damyp keledi:
- Áleýmettik volonterlik – qarttarǵa, balalarǵa, múmkindigi shekteýli jandarǵa kómek.
- Ekologiialyq jáne zoovolonterlik – tabiǵatty saqtaý, janýarlarǵa qamqorlyq.
- Densaýlyq saqtaý salasyndaǵy volonterlik – alǵashqy kómek, donorlyqty nasihattaý, salaýatty ómir salty.
- Mádeni baǵyt – mádeni sharalar uiymdastyrý, tarihi eskertkishterdi saqtaý.
- Qoǵamdyq qaýipsizdik – izdestirý jumystaryna qatysý, kóshede patrýldeý, tótenshe jaǵdailarda kómek kórsetý.
- Sapaly qala ortasyn qalyptastyrý – aýla tazartý, jol qaýipsizdigin arttyrý.
- Is-sharalardaǵy volonterlik – forýmdar, sporttyq jarystar, festivalderde kómek kórsetý.
Volonter bolýdy neden bastaý kerek?
Qazaqstanda volonter bolýǵa kómektesetin resmi platforma bar — QazVolunteer.kz. Bul saitta:
- Volonterlik uiymdar men jobalar jinalǵan;
- Tirkelip, ózińizge qyzyqty baǵytty tańdap, ótinish bere alasyz;
- Tipti aimaq pen sala boiynsha súzgileýge bolady.
- Halyqty aqparattandyrýmen ainalysady;
- Eriktilerge arnalǵan oqý, forýmdar ótkizedi;
- Halyqaralyq jobalarǵa qatysady.
Qazaqstandyq eriktiler EKSPO-2017, Ýniversiada, AEF, OBSE sammiti siiaqty iri is-sharalarǵa belsendi qatysqan. Demek, tájiribe jinap, úlken alańdarda jumys isteý múmkindigi bar.
Volonterlik — úlken múmkindikter álemi. Ol tek kómektesý emes, ósý, úirený, shabyttaný joly. Eger sizdiń júregińizde «paidaly bolǵym keledi» degen niet bar bolsa — bastańyz.
