Волонтер болу немесе белсенді жастардың қатарына қосылу — бұл өзгеге көмектесіп қана қоймай, өзіңізді де дамыту жолы. Оны неден бастау керек? Қандай мүмкіндіктер бар? Осы және басқа да маңызды сұрақтарға жауап іздеп көрейік.
Волонтерлік не береді?
Көпшіліктің ойынша, волонтер ешқандай ақы алмайтын адам. Бұл рас. Бірақ бұл — ол ештеңе алмайды деген сөз емес. Волонтерлердің айтуынша, ең үлкен сый — біреуге пайда әкелгенін сезіну.
Сонымен қатар, волонтерлік:
- Қоғамдық ортада тәжірибе жинауға көмектеседі;
- Резюме үшін пайдалы;
- Байланыс орнатуға, жаңа адамдармен танысуға жол ашады;
- Кейбір университеттерде қосымша балл береді немесе тәжірибе ретінде есептеледі;
- Әлемді көруге мүмкіндік береді — халықаралық жобаларға қатысуға жол ашық.
Бұл жұмыс — уақыт пен күш талап етеді. Кейде еріктілер қиын жағдайға түскен адамдармен жұмыс істейді, ұйымдастыруға қатысады, физикалық күш салады. Ерікті де кейде шаршайды, күйзеліске түседі, сондықтан бастысы — өз мүмкіндігіңізді бағалап, «Неліктен мен волонтер болғым келеді?» деген сұраққа шынайы жауап беру.
Қандай бағыттар бар?
Волонтерлік өте кең сала. Қазақстанда төмендегідей бағыттар дамып келеді:
- Әлеуметтік волонтерлік – қарттарға, балаларға, мүмкіндігі шектеулі жандарға көмек.
- Экологиялық және зооволонтерлік – табиғатты сақтау, жануарларға қамқорлық.
- Денсаулық сақтау саласындағы волонтерлік – алғашқы көмек, донорлықты насихаттау, салауатты өмір салты.
- Мәдени бағыт – мәдени шаралар ұйымдастыру, тарихи ескерткіштерді сақтау.
- Қоғамдық қауіпсіздік – іздестіру жұмыстарына қатысу, көшеде патрульдеу, төтенше жағдайларда көмек көрсету.
- Сапалы қала ортасын қалыптастыру – аула тазарту, жол қауіпсіздігін арттыру.
- Іс-шаралардағы волонтерлік – форумдар, спорттық жарыстар, фестивальдерде көмек көрсету.
Волонтер болуды неден бастау керек?
Қазақстанда волонтер болуға көмектесетін ресми платформа бар — QazVolunteer.kz. Бұл сайтта:
- Волонтерлік ұйымдар мен жобалар жиналған;
- Тіркеліп, өзіңізге қызықты бағытты таңдап, өтініш бере аласыз;
- Тіпті аймақ пен сала бойынша сүзгілеуге болады.
- Халықты ақпараттандырумен айналысады;
- Еріктілерге арналған оқу, форумдар өткізеді;
- Халықаралық жобаларға қатысады.
Қазақстандық еріктілер ЭКСПО-2017, Универсиада, АЭФ, ОБСЕ саммиті сияқты ірі іс-шараларға белсенді қатысқан. Демек, тәжірибе жинап, үлкен алаңдарда жұмыс істеу мүмкіндігі бар.
Волонтерлік — үлкен мүмкіндіктер әлемі. Ол тек көмектесу емес, өсу, үйрену, шабыттану жолы. Егер сіздің жүрегіңізде «пайдалы болғым келеді» деген ниет бар болса — бастаңыз.
