Taldyqorǵanda aýtizm jáne basqa da mentaldy aýytqýlary bar balalarǵa arnalǵan kúndizgi bolý ortalyǵy úsh jylǵa jýyq ýaqyttan beri jumys istep keledi. Búgin ortalyqtyń qosymsha 40 balaǵa arnalǵan ekinshi korpýsy ashyldy,- dep habarlaidy Dalanews.kz
Ortalyqqa balalar PMPK-nyń joldamasymen jáne jeke ońaltý jospary boiynsha qabyldanady. Balalarmen kúnine tórt-tórt jarym saǵat kóleminde sabaq ótkiziledi. Munda defektolog, logoped, tárbieshi jáne minez-qulyqty túzetýge kómektesetin ABA terapiiasy mamandary jumys isteidi.
Oblystyq jumyspen qamtýdy úilestirý jáne áleýmettik baǵdarlamalar basqarmasy basshysynyń orynbasary Sániia Naýryzbaevanyń aitýynsha, qosymsha bólimshe arnaiy kómekke degen suranystyń artýyna bailanysty ashylyp otyr. Búginde óńirde «aýtizm spektriniń buzylysy» (ASB) diagnozy qoiylǵan 460-tan astam bala men jasóspirim tirkelgen.
– Memleket basshysy Qasym-Jomart Toqaev Ulttyq quryltaidyń IV otyrysynda osyndai diagnozy bar balalarǵa erekshe kóńil bólip, olarǵa arnap ońaltý ortalyqtaryn ashý qajettigin aitqan bolatyn. Bizdiń óńirde búginde balalarǵa arnalǵan jeti ońaltý ortalyǵy jumys isteidi. Taldyqorǵandaǵy osy ortalyq úsh jyl buryn ashylǵan. Oblys ákimdiginiń qoldaýynyń arqasynda búgin biz ekinshi korpýsyn paidalanýǵa berip otyrmyz. Aýtizmi bar balalarǵa arnalǵan ortalyqtyń bul filialy ǵimarattyń jalpy aýdany – 580 sharshy metr. Bizdiń maqsatymyz – aýtizmi bar balalardyń óz áleýetin ashýyna kómektesý, olardy qoǵamǵa beiimdeý, – deidi S. Naýryzbaeva.
Atap ótsek, bul ǵimaratta da negizgi korpýstaǵy siiaqty medbike, dáriger, defektolog, logoped siiaqty qajetti pedagogikalyq jáne meditsinalyq mamandar jetkilikti. Jáne barlyq qajetti jabdyqtarmen tolyq qamtamasyz etilgen.
Osy oraida Ortalyqqa kelip júrgen balalardyń ata-analary da pikir bildirdi. Segiz jasar Ańsar Berikjannyń anasy Nazgúl Serikova:
– Biz bul jerde biraz ýaqyt ońaltý sharalaryn qabyldadyq. Sonyń arqasynda ulym mektepke bardy. Biyl ekinshi synypqa kóshtik. Buryn Ańsar atyn ataǵanda múlde qaramaityn. Qazir naqty ilgerileý bar. Balalarǵa kórsetken qamqorlyqtary úshin ortalyqtyń barlyq qyzmetkerlerine úlken raqmetimdi aitamyn! – deidi.
Qazirgi ýaqytta Taldyqorǵanǵa jaqyn ornalasqan aýdandarda turatyn osyndai diagnozy bar balalardyń tizimi jasalyp jatyr. Jaqyn arada bul balalar jańa korpýsqa qabyldanatyn bolady.
