تالدىقورعاندا اۋتيزم جانە باسقا دا مەنتالدى اۋىتقۋلارى بار بالالارعا ارنالعان كۇندىزگى بولۋ ورتالىعى ءۇش جىلعا جۋىق ۋاقىتتان بەرى جۇمىس ىستەپ كەلەدى. بۇگىن ورتالىقتىڭ قوسىمشا 40 بالاعا ارنالعان ەكىنشى كورپۋسى اشىلدى،- دەپ حابارلايدى Dalanews.kz
ورتالىققا بالالار پمپك-نىڭ جولداماسىمەن جانە جەكە وڭالتۋ جوسپارى بويىنشا قابىلدانادى. بالالارمەن كۇنىنە ءتورت-تورت جارىم ساعات كولەمىندە ساباق وتكىزىلەدى. مۇندا دەفەكتولوگ، لوگوپەد، تاربيەشى جانە مىنەز-قۇلىقتى تۇزەتۋگە كومەكتەسەتىن ABA تەراپياسى ماماندارى جۇمىس ىستەيدى.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ءسانيا ناۋرىزبايەۆانىڭ ايتۋىنشا، قوسىمشا بولىمشە ارنايى كومەككە دەگەن سۇرانىستىڭ ارتۋىنا بايلانىستى اشىلىپ وتىر. بۇگىندە وڭىردە «اۋتيزم سپەكترىنىڭ بۇزىلىسى» (اسب) دياگنوزى قويىلعان 460-تان استام بالا مەن ءجاسوسپىرىم تىركەلگەن.
– مەملەكەت باسشىسى قاسىم-جومارت توقايەۆ ۇلتتىق قۇرىلتايدىڭ IV وتىرىسىندا وسىنداي دياگنوزى بار بالالارعا ەرەكشە كوڭىل ءبولىپ، ولارعا ارناپ وڭالتۋ ورتالىقتارىن اشۋ قاجەتتىگىن ايتقان بولاتىن. ءبىزدىڭ وڭىردە بۇگىندە بالالارعا ارنالعان جەتى وڭالتۋ ورتالىعى جۇمىس ىستەيدى. تالدىقورعانداعى وسى ورتالىق ءۇش جىل بۇرىن اشىلعان. وبلىس اكىمدىگىنىڭ قولداۋىنىڭ ارقاسىندا بۇگىن ءبىز ەكىنشى كورپۋسىن پايدالانۋعا بەرىپ وتىرمىز. ءاۋتيزمى بار بالالارعا ارنالعان ورتالىقتىڭ بۇل فيليالى عيماراتتىڭ جالپى اۋدانى – 580 شارشى مەتر. ءبىزدىڭ ماقساتىمىز – ءاۋتيزمى بار بالالاردىڭ ءوز الەۋەتىن اشۋىنا كومەكتەسۋ، ولاردى قوعامعا بەيىمدەۋ، – دەيدى س. ناۋرىزبايەۆا.
اتاپ وتسەك، بۇل عيماراتتا دا نەگىزگى كورپۋستاعى سياقتى مەدبيكە، دارىگەر، دەفەكتولوگ، لوگوپەد سياقتى قاجەتتى پەداگوگيكالىق جانە مەديسينالىق ماماندار جەتكىلىكتى. جانە بارلىق قاجەتتى جابدىقتارمەن تولىق قامتاماسىز ەتىلگەن.
وسى ورايدا ورتالىققا كەلىپ جۇرگەن بالالاردىڭ اتا-انالارى دا پىكىر ءبىلدىردى. سەگىز جاسار اڭسار بەرىكجاننىڭ اناسى نازگۇل سەرىكوۆا:
– ءبىز بۇل جەردە ءبىراز ۋاقىت وڭالتۋ شارالارىن قابىلدادىق. سونىڭ ارقاسىندا ۇلىم مەكتەپكە باردى. بيىل ەكىنشى سىنىپقا كوشتىك. بۇرىن اڭسار اتىن اتاعاندا مۇلدە قارامايتىن. ءقازىر ناقتى ىلگەرىلەۋ بار. بالالارعا كورسەتكەن قامقورلىقتارى ءۇشىن ورتالىقتىڭ بارلىق قىزمەتكەرلەرىنە ۇلكەن راقمەتىمدى ايتامىن! – دەيدى.
قازىرگى ۋاقىتتا تالدىقورعانعا جاقىن ورنالاسقان اۋدانداردا تۇراتىن وسىنداي دياگنوزى بار بالالاردىڭ ءتىزىمى جاسالىپ جاتىر. جاقىن ارادا بۇل بالالار جاڭا كورپۋسقا قابىلداناتىن بولادى.
