QR Konstıtýsıalyq soty qoǵamdyq birlestikterdiń quryltaıshysy bolýǵa quqyǵy bar adamdar tobyn retteıtin "Qoǵamdyq birlestikter týraly" QR Zańynyń 10-babynyń Konstıtýsıaǵa sáıkestigin tekserý týraly ótinishti is júrgizýge qabyldaýdan bas tartty, dep habarlaıdy Dalanews.kz.
Reseı Federasıasynyń azamaty Astana qalasynyń Ádilet departamentine Qazaqstan azamattary men shetel azamattarynyń bastamasymen qurylǵan qoǵamdyq birlestikti tirkeý týraly ótinishpen júgingen. Quzyrly organ ony tirkeýden bas tartty.
"Konstıtýsıalyq sot Zańnyń bul erejesi Konstıtýsıany buzbaıtynyn jáne azamattar men sheteldikterdiń quqyqtyq mártebesiniń arajigin ajyratýdyń negizgi qaǵıdattaryna sáıkes keletinin rastady. Qaýlyda Konstıtýsıaǵa sáıkes sheteldikter men azamattyǵy joq adamdardyń quqyqtary men bostandyqtarynyń shekteýli kólemi bar ekendigi jáne eger olar zańda kózdelgen jáne konstıtýsıalyq qurylysty qorǵaý, qoǵamdyq tártipti, adamnyń quqyqtary men bostandyqtaryn, halyqtyń densaýlyǵy men ımandylyǵyn qorǵaýǵa baǵyttalǵan jaǵdaıda mundaı shekteýlerge jol beriletini atap kórsetilgen (Konstıtýsıanyń 39-baby)", delingen quzyrly organ túsiniktemesinde.
Sondaı-aq, Konstıtýsıalyq sot Qazaqstan ratıfıkasıalaǵan azamattyq jáne saıası quqyqtar týraly halyqaralyq paktiniń erejeleri, eger olar demokratıalyq qoǵamnyń talaptaryna sáıkes kelse, qaýymdastyq bostandyǵy quqyǵyna zańmen belgilengen shekteýlerge jol beretinin atap ótti.
"Konstıtýsıaǵa jáne elimizdegi qoldanystaǵy zańnamaǵa sáıkes Qazaqstan Respýblıkasynyń azamattary ǵana qoǵamdyq birlestikterdiń quryltaıshylary, al eger sheteldikter men azamattyǵy joq adamdardyń qatysýyna qoǵamdyq birlestiktiń jarǵysynda jol berilse, olar qoǵamdyq birlestikterdiń músheleri bola alady (Qoǵamdyq birlestikter týraly zańnyń 10 jáne 11-baptary). Osylaısha, Konstıtýsıalyq sot ótinish berýshiniń konstıtýsıalyq quqyqtaryn buzý belgilerin anyqtaǵan joq jáne konstıtýsıalyq is júrgizýge ótinishti qabyldaýǵa negiz joq degen qorytyndyǵa keldi", delingen habarlamada.
