2026 jylǵy maýsymda áskerde aýyr jaraqat alyp, eki jarym jyldan astam ýaqyt ómir úshin kúresken Erbaian Muhtar qaitys boldy. Bul týraly onyń anasy Gúlsim Qamieva habarlady, dep habarlaidy dalanews.kz.
Eki jarym jyl boiy qazaqstandyqtar onyń emine qarjy jinap, shetelde emdelýine qoldaý kórsetip, saýyǵyp ketýine úmit artqan edi. Alaida qoǵamdy dúr silkindirgen oqiǵa qaiǵyly aiaqtaldy.
Erbaian Muhtar 2023 jyly Almatydaǵy Ulttyq ulannyń №5571 áskeri bóliminde merzimdi áskeri qyzmetin ótep júrgen bolatyn. Jaqyndarynyń aitýynsha, ol áskerge densaýlyǵy jaqsy, eshqandai shaǵymsyz attanǵan. Otbasy onyń Otan aldyndaǵy boryshyn ótep, aman-esen úige oralady dep sengen. Biraq 2023 jylǵy 4 jeltoqsanda olardyń ómiri kúrt ózgerdi.
Sol kúni Erbaian aýyr halde aýrýhanaǵa jetkizildi. Dárigerler oǵan aýyr bas-mi jaraqaty, sýbdýraldi gematoma jáne jelke súieginiń synýy diagnozyn qoidy. Resmi málimette sarbazdyń dárethanada taiyp qulap, basyn kafelge soqqany aityldy. Alaida otbasy bul nusqaǵa birden kúmán keltirdi.
«Meniń balam áskerge sap-saý bolyp ketti. Al bizge ony múgedek kúiinde qaitardy. Mundai jaraqat jai ǵana qulap qalýdan bolýy múmkin emes», – dep birneshe ret málimdegen bolatyn Erbaiannyń anasy Gúlsim Qamieva.
2024 jyldyń alǵashqy ailary Erbaian úshin ómir men ólim arasyndaǵy kúreske ainaldy. Ol birneshe kúrdeli operatsiiany bastan ótkerip, tórt ai boiy komada jatty. Dárigerler onyń ómirin saqtap qalýǵa bar kúshin saldy. Anasy ulynyń janynan bir sátke de alystamady.
Tórt aidan keiin Erbaian esin jiǵanymen, onyń jaǵdaiy aýyr bolyp qala berdi. Ol ózdiginen qozǵala almaityn, sóileý qabileti de aitarlyqtai zaqymdanǵan edi. Osy ýaqytta qazaqstandyqtar onyń emine qarajat jinaýdy bastady. Keiin qaiyrymdylyq esebine 200 million teńgeden astam qarjy jinaldy.
2024 jyldyń ekinshi jartysynda Erbaian Túrkiiaǵa emdelýge jiberildi. Sheteldik mamandar uzaq merzimdi ońaltý baǵdarlamasyn bastap, onyń jaǵdaiyn baqylaýǵa aldy. Arnaiy qurylǵylardyń kómegimen qozǵalý jattyǵýlary júrgizildi. Myńdaǵan adam onyń saýyǵyp ketýine úmit artty.
2025 jyly áleýmettik jelilerde Erbaiandyń aiaqqa turyp, robottandyrylǵan qurylǵylardyń kómegimen jattyǵý jasap júrgen beinejazbalary tarady. Bul kórinister kópshilikke úmit syilady. Anasy da ulynyń jaǵdaiynda oń ózgerister baiqalyp jatqanyn aityp, halyqqa alǵys bildirip otyrdy. Biraq onyń tolyq saýyǵyp ketýi úshin uzaq ýaqyt qajet ekeni belgili edi.
Erbaiannyń densaýlyǵy úshin kúrespen qatar, onyń jaraqat alý sebepteri de qoǵam nazarynan túsken joq. Resmi organdardyń «taiyp qulady» degen nusqasy kópshiliktiń kúmánin seiilte almady. Otbasy men qorǵaýshylar oqiǵanyń barlyq mán-jaiyn anyqtaýdy talap etti. Is keiin Bas prokýratýranyń qaraýyna ótti.
Erbaian Muhtardyń advokaty Inga Imanbai birneshe ret istiń tolyq ashylmaǵanyn aityp, qosymsha tergeý júrgizý qajettigin málimdegen bolatyn.
«Biz basynan bastap resmi nusqamen kelisken joqpyz. Iste jaýapsyz suraqtar óte kóp. Barlyq kináli adamdar anyqtalyp, ádil sheshim qabyldanýy kerek», – degen edi advokat.
Onyń aitýynsha, otbasy shyndyqtyń tolyq ashylýyn talap etti. Alaida eki jylǵa jýyq ýaqyt ótse de, qoǵam kókeiindegi kúmán tolyq seiilgen joq. Áleýmettik jelilerde jáne qoǵamdyq ortada «Erbaian naqty qalai jaraqat aldy?» degen suraq jii kóterildi. Bul másele qoǵamnyń jiti nazarynda boldy.
2026 jylǵy mamyr aiynda Erbaiandyń jaǵdaiy kúrt nasharlady. Ol Astanadaǵy Ulttyq shuǵyl meditsinany úilestirý ortalyǵyna jetkizilip, jansaqtaý bólimine jatqyzyldy. Dárigerler onyń jaǵdaiy óte aýyr ekenin málimdedi. Eki jarym jyl boiy jalǵasqan kúres sońǵy kezeńine jetti.
Ulynyń qaitys bolǵanyn habarlaǵan Gúlsim Qamieva áleýmettik jelidegi jazbasynda:
«Meniń Erbaianym ómirden ótti. Eki jarym jyl boiy balam úshin kúrestim. Biz sońyna deiin úmit úzgen joqpyz», – dep jazdy.
Erbaian Muhtardyń qazasy qoǵamǵa aýyr tidi. Óitkeni eki jarym jyl boiy el bolyp duǵa tilep, qarjylai qoldaý kórsetken jurt onyń jazylyp ketýine sengen edi. Biraq bul úmit aqtalmady. Alaida Erbaiandyń ólimimen birge qoǵamnyń suraqtary da joǵalyp ketken joq.
Búginde jurtshylyqty «Áskerge deni saý bolyp attanǵan jas jigit nege osyndai jaǵdaiǵa dýshar boldy?», «Kináliler tolyq anyqtaldy ma?», «Mundai qaiǵyly oqiǵalar qaitalanbas úshin qandai sabaq shyǵaryldy?» degen suraqtar alańdatady. Óitkeni Erbaian Muhtardyń taǵdyry bir otbasynyń ǵana emes, tutas qoǵamnyń júregine túsken jara.
