AQSh prezidenti Donald Tramptyń arnaiy ókilderi Stiv Ýitkoff pen Djared Kýshner Kievte Ýkraina prezidenti Vladimir Zelenskiimen tórt saǵatqa jýyq kelissóz júrgizip, buǵan deiin usynylǵan beibit josparlardyń jańartylǵan nusqalaryn talqylady, dep habarlaidy dalanews.kz.
Financial Times derekkózderiniń málimetinshe, amerikalyq ókilder Kievke múlde jańa usynystardyń úlken paketin ákelmegen. Olar buǵan deiingi bastamalardy qaita jandandyryp, Máskeý men Kievtiń ustanymdaryn jaqyndatýǵa tyrysqan.
Kelissózderdiń negizgi taqyryptarynyń biri Donbass máselesi bolǵan. Resei óńirdi tolyq baqylaýǵa alýdy talap etip otyr, al onyń bir bóligi áli de Ýkraina baqylaýynda.
Vladimir Zelenskii kezdesýden keiin taraptardyń aýmaq máselesin talqylaǵanyn rastady. Alaida Ýkraina prezidenti mundai máselelerdi túpkilikti túrde memleket basshylary ǵana sheshýi kerek ekenin aitty.
Kezdesýde sondai-aq AQSh, Resei jáne Ýkraina arasyndaǵy úshjaqty kelissózderdi qaita bastaý múmkindigi qaralǵan. Djared Kýshner Vashingtonnyń kelissózder formatyn qaita jandandyrýǵa úmitti ekenin málimdedi.
Ýitkoff pen Kýshner Kievke 6 qyrkúiekte, Máskeýde Resei prezidenti Vladimir Pýtinmen úsh saǵattan astam kelissóz júrgizgennen keiin barǵan. Alaida qazirgi ýaqytta kelissózderde naqty diplomatiialyq ilgerileý bolǵany týraly aqparat joq.
Ýkraina úshin Donbass máselesi negizgi túitkilderdiń biri bolyp qala beredi. Kiev Resei baqylaýyndaǵy aýmaqtardy berýge kelispeitinin buǵan deiin de birneshe ret málimdegen.
